थारु म्यूजिक भिडियो ए हजुर सार्वजनिक
राज चौधरी
धनगढी ५ कुवाँर । नेपालके सुन्दर ठाउँ तिलिचो टलुवामे छायाँकन करल पहिल थारु म्यूजिक भिडियो ‘ए हजुर’ सार्वजनिक करल बा । शुकके रोज ५ बजे गीत बी एण्ड जी इन्टरटेन्मेन्ट नेपाल नामके यूटुब च्यानलसे गीत सार्वजनिक करल हो ।
थारु गीतसंगीतफे व्यवसायिकओर उन्मुख हुइटी रहल बेला फेरसे एक ठो गीत चर्चा पाई लागल बा । टमान म्यूजिक भिडियो छायाङकन करसेकल निर्देशक हिरा चौधरी यी गीतहे निर्देशन करले बटै ।
दर्शकहुकनहे कुछ नयाँपन डेना प्रयास करल उहाँ बटैलै । तिलोचो टलुवामे पुगके टिमसे बहुट मेहनत करल ओरसे उहे अनुसार दर्शकहुकनके साथ ओ माया पैना उहाँक विश्वास बा । निर्देशक चौधरी कहलै, ‘तिलिचो टलुवा पुग्न केल तीनदिन लागल । उहाँ दुईदिन छयाङकनपाछे लौटना फेर तीन दिन लागल । गीतमे तिलिचो टलुवा क्षेत्रमे केल नइहुके मनाङके दृष्यफे हेरे मिलना ।
बेसक्याम्प, उप्पर मनाङ, हुम्दी, ढुकुर पोखरी, ग्रिनलेक, ताल गाउँ लगाएतके ठाउँ पुगके भिडियो तयार पारल बा ।’ एक ठो गीतमे ढेर ठाउँ हेरे पैना करके म्यूजिक भिडियो तयार हुइल ओरसे गीतहे मन परैना निर्माण पक्षके विश्वास बा । यी म्यूजिक भिडियो तयार पर्ना ६ लाख रुप्या खर्च करल निर्माण पक्ष जनैले बा ।
रविन चौधरी ओ समिक्षा चौधरीके आवाज रहल गीतमे मनोज चौधरी ओ नेहा चौधरी अभिनय करले बटै ।
रोहित सिंह चौधरीके म्यूजिक रहल गीतहे गणेश चौधरी एरेन्ज करले बटै । जि म्यूजिक रेकर्डिङ स्टुडियोमे रेकर्ड करल गीतहे म्याडम्याक्स (विक्रम) छायांकन करले बटै । हिरा चौधरी निर्देशन करल म्यूजिक भिडियोहे मिलन विश्वकर्मा सम्पादन तथा कलरिङ करले बटै ।
