वन्यजन्तु संरक्षण तथा सुरक्षाके लाग नयाँ अभ्यास
विमला चौधरी
नेपालगञ्ज, ६ कुवाँर । बाँकेके राप्ती सोनारी– ८ स्थित शिवशक्ति माविके छात्रा रोजीना थारु प्रकृति ओ वन्यजन्तुबारे पहिल चो चित्र कोर्ने अवसर पैली । अपने विद्यालयके अतिरिक्त क्रियाकलापमे भाग लेटी आइल रोजीना शुकके बाँके राष्ट्रिय निकुञ्ज सुरक्षामे खटल अर्जुन बाण गणके सेनासे आयोजनाके चित्रकला प्रतियोगितामे वन्यजन्तु ओ मानवबीचके सहअस्तित्व झल्कन चित्र क्यानभासमे उतारके उहाँ पहिल पुरस्कारफे प्राप्त कैना सफल हुइली । उहाँ निकुञ्ज मध्यवर्ति क्षेत्रमे बसोवास करटी अइलेसेफे निकुञ्जबारे अध्ययन ओ सुरक्षामे खटल सेनासंग पहिल चो अपन प्रतिभा डेखैना ओ सवालजवाफ कैना अवसर पाइल बटैली । उहाँ कहली, ‘प्रकृति ओ वनयजन्तु संरक्षणबारे हम्रे जानकारी पाके हमार अभिभावक ओ छरछिमेकहेफे सिखाई सेक्बी ।’
उहाँ जस्टे राप्ती सोनारी –८ स्थित भगवती आधारभूत विद्यालयके छात्र यमलाल कवँरफे मानव ओ वन्यजन्तुबारे चित्र मार्फत अपन कला प्रस्तुत कैना अवर पैलै, ओ दुसरा पुरस्कार हात परलै । उहाँफे अपन विद्यालयके अतिरिक्त क्रियाकलापमे फरक प्रतियोगिताके प्रतिस्प्रधा करटी आइलमे पहिल चो निकुञ्जबारे अपने जानल बाट चित्र मार्फत प्रस्तुत करे पाके पुरस्कार शिव शक्ति मध्यामिक विद्यालयके छात्रा समिक्षा थारु ओ चौथा पुरस्कार भगवती आधारभूत विद्यालयके छात्रा वेसिना पुन प्राप्त करलै ।
बाँकेके राप्ती सोनारी –८ अन्तर्गतके विद्यालयके छात्र छात्राहे सहभागी कराके बाँके राष्ट्रिय निकुञ्ज सुरक्षामे खटल नेपाली सेनासे प्रकृति ओ वन्यजन्तु संरक्षण तथा सुरक्षा सम्बन्धी चेतना अभिबृद्धिके लाग नयाँ अभ्यास सुरु करल हो । प्रकृति संरक्षण तथा वन्यजन्तुके सुरक्षाबारे जानकार हुके जागरुक करैना उद्देश्यसे निकुञ्ज मध्यवर्ती क्षेत्र अन्तर्गत विद्यालयके निकुञ्ज सम्बन्धित चित्रकला प्रतियोगिता तथा स्न्याप प्रश्न उत्तर कार्यक्रम करल बाँके राष्ट्रिय निकुञ्ज सुरक्षामे खटल अर्जुन बाण गणके गणपति प्रमुख सेनानी अशोक खड्का जानकारी डेलै ।
विद्यालयके छात्र छात्राहे निकुञ्जके सुरक्षा ओ मध्यवर्ती क्षेत्रके स्थानीय बासिन्दाससंगके सम्बन्धबारे जानकारी डेहक लाग अव यैसिन कार्यक्रम निरन्तर आयोजना कैना प्रतिबद्धता जनैलै । कार्यक्रममे राप्ती सोनारी ८ अन्तर्गतके ५ ठो विद्यालयके १०९ जाने छात्र छात्राहे सहभागिता कराइल प्रमुख सेनानी खड्का जाकारी डेलै । साथे विद्यार्थीसंग कार्यक्रममे उपस्थित हुके शिक्षकहुकनसंग सम्बन्धित विद्यालयके पुस्तकालयमे धारके अध्ययनके लाग संरक्षणके क्षेत्रमे काम करटी रहल टमान संघ संस्थाके सहयोगमे निकुञ्ज ओ वन्यजन्तु संरक्षण सम्बन्धित पुस्तकफे उपलब्ध कराइल रहे ।
प्रतियोगितामे विजेता छात्र छात्राहे राप्ती सोनारी ८ के वडा अध्यक्ष शालिकराम डाँगी, बाँके राष्ट्रिय निकुञ्जके सहायक संरक्षण अधिकृत उत्तम चौधरी, मध्यवर्ती क्षेत्र व्यवस्थापन समितीके अध्यक्ष गेहेन्द्र कुमार खड्कालगायत पुरस्कार वितरण करल रहिट । चित्रकला प्रतियोगिता तथा स्नायप प्रश्न उत्तर कार्यक्रमके लाग बाँके राष्ट्रिय निकुञ्ज कार्यालय तथा संरक्षण साझेदार संस्था जेडएसएल नेपाल, हिमालयन नेचर, तराई भुपरिधि कार्यक्रम ताललगायत सहकार्य करल रहे ।
