भजनीके बाढ प्रभावितहे राहात सामग्री हस्तान्तरण
पहुरा समाचारदाता
भजनी, ६ कुवाँर । भजनी नगरपालिका–८ खल्लाटोलके बाढ तथा डुबानसे प्रभावित सिमान्तकृत समुदायके अतिविपन्न घर परिवारहे खाद्य तथा पोषण राहात सामाग्री हस्तान्तरण कैगिल बा ।
बहुउद्देश्यीय बिकास समाज डडेल्धुरासे संचालित ‘बाढी पहिरोको उच्च जोखिमको पूर्ब तयारी तथा प्रतिकार्य परियोजना’ अन्तर्गत उ सामाग्री हस्तान्तरण कैगिल हो ।
भजनी नगरपालिका–८ खल्लाटोलके ६१ घरपरिवारहे चाउर १५२५ केजी, दाल मिक्स २४४ केजी, नोन १२२ केजी, तेल १२२ लिटर, चिनी १८३ केजी, टुथ पेस्ट १२२ पिस, निलकटहर ६१ पिस, टुथब्रस ३६६ पिस, सेप्टी प्याड ३०५ प्याकेट, लहैना साबुन २४४ पिस, लुगाधुइना साबुन ४८८ पिस, लुगाधुइना सोडा १२२ प्याकेट, झुल ६१ पिस, पिफम १२२ मिटर, तन्ना ६१ पिस, त्रिपाल ६१ पिस, ब्ल्याङकेट ६१ पिस वितरण करल संस्थाके डिआरआर एक्सपर्ट राजेन्द्र रैका जानकारी करैलै ।
उ सामाग्री भजनी नगरपालिकाका वडा नं ८ के अध्यक्ष पंकज चौधरी ओ संस्थाके परियोजना संयोजक शिवराज पाठक संयुक्त रुपमे हस्तान्तरण करल रहिट । संस्थासे यी आघे भजनी नगरपालिका वडा नं १, ३ ओ ८ मे बाढ ओ डुबानसे प्रभावित ६७ घरपरिवारहे राहत वितरण करल रहे ।
यी आघे संस्थासे संचालित टमान कार्यक्रमके अनुगमनके क्रममे भजनी नगरपालिकाके मेयर केवल चौधरी स्थानीयस्तरमे विपद जोखिम न्यूनीकरण, तत्काल राहात वितरण ओ समुदायमे सचेतना अभिवृद्धि कैना काममे संस्थासे खेलल महत्वपूर्ण भूमिकाके प्रशंसा करटी धन्यवाद ज्ञापन करल रहिट ।
