डसियक मुहमे बेमौसमी पानी बरसके किसानहुकन धान ओसर्न कर्रा
पहुरा समाचारदाता
धनगढी, २ कार्तिक । बेमौसी पानी बरसके किसानहुकनहे धान ओसर्ना कर्रा हुइल बा । धान ओसारके मजासे डसिया मनैना सोचमे रहल कैलाली जिल्ला कैलारी गाउँपालिका वडा नम्बर ५ पवेराके किसान धान ओसर्नाकी डसिया मनैना चिन्ता रहल बटैलै । उहाँ कहलै, पानी अइना सूचना गानघुन सुनल मने काटल धानहे पुल बाँन्धके समयमे ठेसर लगाई नइसेकलपाछे एक विघाके धान भिजके ओसर्ना बा ।’
खाल्ह खेतुवा काटल धानमे पानी जमके फेरसे धान जम्नाहस हुइल बा,’ उहाँ कहलै, ‘डुबारा निन्हा विल्टाई परल बा । दोहोरा मेहनत कैना बाध्यता आइल बा ।’ डसियाके मुहमे धान भिजलपाछे धान ओसर्नाकी डसिया मनैना चिन्ता हुइल उहाँ बटैलै । भर्खर लगाइल आलुफे पानी भरके सरना अवस्था रहल किसान बटैलै । उहाँ कहलै, ‘दुई कटठामे थारु आलु लगैले रहुँ । सोम्मारके रोज बरसल पानीसे लगाइल आलु सरना हस बा । आलु नइजम्लेसे थारु आलुके विया उखटजैनाहस बा ।’
धनगढी उपमहानगरपालिका–१५ के किसान मोहनलाल चौधरी काटल धानक गेँरामे पानी भरलपाछे मच्छी ओहदेहस पानी फेकाई पर्ना अवस्था आइल बटैलै । उहाँ कहलै, अँटवारके रोज धान कटनु, सोम्मारके रोज पुली बाँन्धके ठेसरसे डवैना योेजना रहे । उहे काटन धानके गँेरा भर भर पानी भरलपाछे विजोग हुइल बा ।
कैलारी गाउँपालिका वडा नम्बर ७ फुइयाँफाटाके किसान फुलराज चौधरी बेमौसी पानी आके पाकल धान ओसर्ना कर्रा हुइल बटैलै । उहाँ कहलै, धान ठेर्सिङ कैना बाँकी रहे । पानीसे धान भिजाइलपाछे उहीहे सुखुवाइक लाग फेरसे डुबारा मेहनत कैना बाध्यता बा ।
