कैलारी–४ के गाउँमे १० दिने मन्डरा बजैना तालिम हुइल

पहुरा समाचारदाता
धनगढी, ६ अगहन । कैलाली जिल्लाके कैलारी गाउँपालिका वडा नम्बर ४ के गाउँमे थारु समुदायके संस्कृति संरक्षणके लाग हुइल मन्डरा बजैना÷बनैना तालिम सुरु निम्जल बा ।

‘हमार भाषा, कला, संस्कृति हमार पहिचान यिहीहे बचैना हमार अभियान’ कना मुल नाराके साथ आदिवासी जनजाती थारु समुदायके संस्कृति संरक्षणके लाग सुरु हुइल १० दिने तालिम समापन कार्यक्रम कैलारी गाउँपालिकाके उपाध्यक्ष भगवतीकुमारी चौधरीके वडका पहुनामे हुइल रहे ।

समापन कार्यक्रममे सम्बोधन कैटी गाउँपालिका उपाध्यक्ष तथा कार्यक्रमके वडका पहुना थारु समुदायके मन्डरा बजुइयाके अभाव रहल ओरसे यी तालिमसे १५ जाने मन्डरा बजुइया व्यक्ति तयार पारल बटैली । थारु समुदायके भाषा, कला संस्कृति, परम्परा, रिति संंस्कृति विस्तारै लोप हुइटी गैल ओरसे पुर्खनके सिखाइल संस्कृति संरक्षण कैना आवश्यक रहल बटैली । थारु गाउँघरमे फेरसे पुरान नाँच सुरुवाट कैना प्रयास हुईबेर मन्डरीय नइमिल्ना ओरसे मन्डरा मनै उत्पादनके लाग तालिम डेहल उहाँ बटैली ।

गाउँपालिकासे अब्बे ढकिया बुन्ना, थारु लेंहगा सिल्ना तालिम डेसेकल उपाध्यक्ष बटोइली । उहाँ कहली, थारु समुदाय अपन प्रयोग कैना चिज पहिले अपनही बनाइट, अपन खैना सक्कु चिज अपनही उत्पादन करिट मने अब्बे सुकुवार हुइटी गैल बटै । पालिकासे जिविकोपार्जनसे लेके आयमुलक सीप मुलक तालिम डेसेकल बा । उहीहे सदुपयोग करलेसे आम्दानीके स्रोत बने सेकी लर्का बच्चा पैसा आइसेकी । लेहंगा तालिमपाछे आब लेंहगा लेहक लाग बाहेर जाई नइपर्नाफे उहाँ बटैली ।

कैलारी गाउँपालिका वडा नम्बर ४ के वडा अध्यक्ष ठागुराम चौधरीके घरगोस्यामे हुइल कार्यक्रममे कार्यपालिका सदस्य लालबहादुर विक, वडा सदस्य हरिद्वारी चौधरी, मोहनलाल चौधरी, लक्ष्मी चौधरीलगायतके सहभागिता रहे । कार्यक्रमके संचालन वडा सचिव श्रीप्रसाद चौधरी करल रहिट ।