सोनके गहना लुटेक लाग महिलाके हत्या

घटनामे संलग्न ६ जाने पक्राउ

पहुरा समाचारदाता
कञ्चनपुर, ७ अगहन । कञ्चनपुर जिल्लाके शुक्लाफाँटा नगरपालिका–७ शान्तिपुर बैठना ६५ वर्षीया नारुदेवी जोशीके हत्या करके सोनके गरगहना लुटपाट तथा लुटल गहना किनबेचमे संलग्न रहल अभियोगमे ६ जनहनहे प्रहरी पक्राउ करले बा ।

पक्राउ परुइयामे शुक्लाफाँटा नगरपालिका–७ झण्डाभोज बैठना २८ वर्षीय महेश डगौरा, कैलाली धनगढी उपमहानगरपालिका–१३ कैलाली गाउँ बैठना ३५ वर्षीय लक्ष्मण चौधरी, ३२ वर्षीय निरज भट्ट, धनगढी उपमहानगरपालिका–१ बैठना २८ वर्षीय ईन्द्र बराल सुनार, ४३ वर्षीय खगेन्द्रबहादुर सोव ओ उहे उपमहानगरपालिका–४ बैठना ४० वर्षीय दिपेन्द्र सिजापती रहल बटै ।

ओइनेमध्ये महेश डगौरासे हत्या करके सोनके गहना लुटल, लक्ष्मण चौधरी ओ निरज भट्ट सुनके गहना बिक्री कैना तथा न्यू बर्दादेवी सुनचाँदी पसलके संचालक ईन्द्र बराल सुनार, न्यू दिया सुनचाँदी पसलके संचालक खगेन्द्र बहादुर सोव ओ सुजल सुनचाँदी पसलके संचालक दिपेन्द्र सिजापती उ सोनके गहना खरिद करल खुले आइल प्रदेश प्रहरी कार्यालय जनैले बा ।
नारुदेवी जोशी कार्तिक १९ गते दुपहर घाँस काटे कहिके अपने घर लग्गे मध्यवर्ती सामुदायिक वनओर गैलमे घरमे लौटके नइआइलपाछे खोजी कैना क्रममे कार्तिक २० गते उ वनमे शव फेला परल रहे । घटनाके अनुसन्धानके क्रममे महेश डगौराहे झलारी बजारसे अगहन १ गते प्रहरी पक्राउ करल रहे ।

महेश मध्यवर्ती सामुदायिक वनके गेटसे भिटर ओर जैटी रहल अवस्थामे नारूदेवीसंग घाँस काटडेम कहिके हँसिया मागक उ हँसिया कुछ द्र फेक्के उहाँक चुन्नी जैसिन कपडासे घाँट कसके हत्या करल ओ मृतकके दुनु कानमे रहल मुन्द्रा, नाकमे लगाइल फुली लुटल अनुसन्धानके क्रममे खुल्न आइल बा । साथे लुटल सोनके गहना समेत तीनु पसलसे प्रहरी बरामद करले बा । यी सम्बन्धमे प्रहरीसे आवश्यक अनुसन्धान करटी रहल बा । सोन बिक्रीके लाग डगौरा सहकर्मी लक्ष्मण चौधरी ओ नीरज भट्टहे पठैले रहिट । चौधरीसे नीरज भट्टहे सोन बिक्रीके लाग तीनु पसलमे लैगिल बा ।

तीनु पसलमे करके ४६ हजारके सोन बेचल प्रहरी अनुसन्धानसे डेखैले बा । नारुदेवीके हत्यामे संलग्न महेश डगौरा, सोन बेचे जैना लक्ष्मण चौधरी, नीरज भट्ट ओ सोन किन्न इन्द्रबहादुर बराल, खगेन्द्र सोब ओ दीपेन्द्र सिजापतिहे बिफेक रोज कञ्चनपुर प्रहरी सार्वजनिक करले बा । लक्ष्मण चौधरी ओ नीरज भट्ट अपनेहुकनसंग गोसिनीय बिरामी रहल ओरसे इमर्जेन्सीमे सोन बेच्न आग्रह करलपाछे किनडेहल सुनचाँदी पसलधनी बटैले बटै ।

महेश डगौराके नाममे कर्तव्य ज्यान ओ लुटपाट, अन्य मतियार ओ सुन पसलधनी विरुद्धमे गैर कानुनी सुन खरिद बिक्रीके मुद्दा लगैना तयारी करल बा ।