टीकापुर घट्नाके कैद मिनाहामे सर्वोच्चसे कारण देखाऊ आदेश

पहुरा समाचारदाता
धनगढी, ७ अगहन । सर्वोच्च अदालतसे टीकापुर घट्नामे संलग्न आरोपमे तीन जनहनहे आममाफी डेना सरकारके निर्णय विरुद्ध परल रिटमे कारण देखाउ आदेश जारी करले बा ।

सरकारके सिफारिसमे राष्ट्रपति रामचन्द्र पौडेलसे संविधान दिवसके अवसर पारके कैद मिनाहा करडेहलपाछे हरिनारायण चौधरी, वीरबहादुर चौधरी, प्रदीप चौधरीलगायत गैल कुवाँर ३ गते रिहा हुइल रहिट ।

टीकापुर नरसंहारमे मारल नेपाल प्रहरीके इन्सपेक्टर केशव बोहराके गोसिनीय शारदा कडायत लगायतसे दायर करल रिटउप्पर सुनुवाइ करटी न्यायाधीश प्रकाशकुमार ढुंगानाके एकल इजलाससे उ आदेश जारी करल हो ।

२०७२ भदौमे कैलालीके टीकारपुरमे ८ सुरक्षाकर्मी ओ एक दूधे बालकके ज्यान जैना करके हुइल घटनामे जन्मकैद सजाय सुनाइल रेशम चौधरी गणतन्त्र दिवसके अवसरमे सजाय मिनाहा पाके गैल जेठ १५ गते छुटल रहिट । रेशम चौधरीके कैद मिनाहा कैना राष्ट्रपतिके निर्णय बदर हुई पर्ना माग धारके टीकापुर घटनामे गोसिया गुमाइल शारदा कठायतसे गैल जेठ १६ गते सर्वोच्चमे रिट दायर करल रहिट ।