धार्मिक पर्यटन प्रवर्धनके लाग लवाङ्गी पूजा हुइना
पहुरा समाचारदाता
धनगढी, ९ अगहन । कैलालीके गौरीगंगा नगरपालिका–१०, सुन्दरपुरमे छैठौं लवाङ्गी पूजा तथा सांस्कृतिक कार्यक्रम २०८० हुइना हुइल बा ।
‘भाषा, कला संस्कृति हमार पहिचान, थारु वैदिक गुरुवा प्रशिक्षण केन्द्र संगे थारु संग्राहलय बनैना हमार अभियान’ कना मूल नारा सहित इहे अगहन १६ ओ १७ गते कार्यक्रम हुइना हुइल हो ।
कार्यक्रममे सांस्कृतिक कार्यक्रम, ढाक बजैना गुरुवा नाच, रातभर देउतनके फुलवार बाचन, पुजापाठ कैना कार्यक्रम रहल गुरुवा बैदावा सेवा समितिके सचिव धनीराम चौधरी जानकारी डेलै ।
२०७५ सालमे स्थापना हुइल देउथानके प्रचारप्रसार ओ धार्मिक पर्यटक प्रवर्धन कर्ना उद्देश्यसे सामुहिक देउथान स्थापना कैके हरेक बरस लवाङ्गी पुजा ओ सांस्कृतिक कार्यक्रम हुइटी आइल बा । एकर संगे थारु वैदिक गुरुवा तालिम केन्द्र ओ सग्रहालयके लाग भवन निर्माण हुइटी आइल बा ।
वडा नम्बर १० के कार्यालयसे वैदिक गुरुवा तालिम केन्द्र निर्माणके लाग आर्थिक बरस २०७७/०७८ ओ २०७८/०७९ मे रु. पाँच/पाँच लाख ओ २०७९/०८० मे रु. सात लाख आर्थिक सहयोग करले बा । जौन भवन अब्बे लिन्टरसम हुइल सचिव चौधरी जानकारी डेलै । सचिव चौधरीके अनुसार तालिम केन्द्र निर्माण हुइलपाछे थारु वैदिक गुरुवा तालिम केन्द्र, थारु सग्रहालय, योग अभ्यास केन्द्र, थारु वैदिक अध्ययन केन्द्रके रुपमे विकास कैना जनैलै ।
