१२ करोड ४२ लाख ढेर निक्षेप संकलन
पहुरा समाचारदाता
धनगढी, ९ अगहन । धनगढी उपमहानगरपालिका वडा नम्बर ७ भानुचोक, देवहरियास्थित नवज्योति कृषि सहकारी संस्था लिमिटेड यी आर्थिक वर्षमे १२ करोड ४२ लाख ४६ हजार ३ सय ४४ रुपैयाँ निक्षेप संकलन करले बा ।
यी आर्थिक वर्षमे असार मसान्तसम ओत्र निक्षेप संकलन हुइल शनिच्चरके रोज धनगढी हुइल सहकारीके १५ औं वार्षिक साधारण सभामे जानकारी कराइल रहे । सहकारी गैल वर्ष १२ करोड ७० लाख ३५ हजार ७ सय ४८ रुपैयाँ निक्षेप संकलन रहले रहे ।
उ सहकारी संस्था आर्थिक वर्ष २०७९/०८० मे १० करोड ३० लाख ३५ हजार ५ सय ९४ रुपैयाँ लगानी करले बा कलेसे गैल आर्थिक वर्षमे ११ करोड ४९ लाख ९७ हजार ९ सय ८२ रुपैयाँ लगानी करले रहे । संस्थाके शेयर सदस्यहुकनके आर्थिकस्तर बृद्धि तथा सामाजिक आवश्यकता परिपूर्ति करना उद्देश्यसे सहकारी कर्जा लगानी तथा असुलीमे समय सापेक्ष परिमार्जन करटि कर्जामे कृषि, व्यापार, हायर प्रचेज, घर निर्माणलगायत टमान शीर्षकमे कर्जा प्रवाह कैके शेयर सदस्यहुकनहे स्वरोजगार तथा आत्मानिर्भरतामे सहयोग करटि रहल बा ।
आठ सय ६१ जाने शेयर सदस्य रहल सहकारीमे ५२ लाख २७ हजार १ सय ६३ रुपैयाँ जगेडा कोष रहल बा । संस्थाके अधिकृत पुँजी ५ करोड रहल बा । उ मध्ये २०७० असार मसान्तमसके शेयर पुँजी ८८ लाख ८४ हजार ४ सय रहलमे यी वर्षके असार मसान्तसम चुक्ता शेयर पुँजी १ करोड १६ लाख ७१ हजार १ सय पुगल सहकारीके प्रतिवेदनमे उल्लेख करल बा । आस्टेक, यी आर्थिक वर्षमे १३ लाख ३१ हजार ८ सय ७४ रुपैयाँ शुद्ध नाफा करल सहकारी जनैले बा ।
सहकारी आर्थिक वर्ष २०८०/०८१ के लाग टमान कार्यक्रमके लक्ष्य रहल जनैले बा । सहकारी खराब कर्जा बृद्धि हुइ नैडेना जनचेतना कार्यक्रम करना, भाखा नाघल कर्जाहे ५ प्रतिशतसे कम करना, शेयर सदस्य बृद्धि करना, सहकारीहे सवल बनाइक लागल टमान निकायसे समन्वय करना, शेयर सदस्यके क्षमता अभिबृद्धिके सहकारी शिक्षाके व्यवस्था, टमान मेरिक तालिमके व्यवस्था करना, रासायनिक मलके साथे दैनिक उपभोग्य वस्तुके विक्री विरण करना, कृषि अनुदानके व्यवस्था मिलैना लगायतके लक्ष्य रहल जनैले बा ।
उ अवसरमे सहकारी संस्था असल ऋणी ओ कर्मचारीहे सम्मान फेन करल बा । असल ऋणीहुक्रे पल्टुराम चौधरी, महेन्द्र राना, घनश्याम राना ओ अन्तराम चौधरी रहल बटैं कलेसे सहकारीके कर्मचारी सन्योवरी रानाहे फेन सम्मान करल रहे ।
संविधान सभा सदस्य प्यारेलाल राना उद्घाटन करल कार्यक्रमके सहकारी संस्थाके अध्यक्ष सीताराम रानाके अध्यक्षतामे हुइल रहे । कार्यक्रमके उद्घाटन करटि संविधान सभा सदस्य राना कृषिमे निर्भर कृषकहुकनके आर्थिक समृद्धिमे सहकारी संस्था महत्वपूर्ण योगदान करल बटैलैं । उहाँ सहकारीमे शेयर सदस्य बह्राइ सेक्लेसे शेयर सदस्यहुकनके सेवामे फेन सुधार हुइना बटैलैं । ओस्टेक, उहाँ सहकारीके सम्वद्र्धन एवं प्रवद्र्धनके लाग सरकारी तवरसे पहल करना प्रतिवद्धता व्यक्त करले रहैं ।
कार्यक्रममे संविधान सभा सदस्य मालामती राना, धनगढी उपमहानगरपालिका वडा नम्बर ७ के वडाध्यक्ष मोती रानाथारु, राष्ट्रिय सहकारी बैंकके दिनेश गेलाल, देउवहरिया गाउँक भल्मन्सा जगन्नाथ रानालगायत मन्तव्य व्यक्त करले रहैं । कार्यक्रमके सञ्चालन सहकारीके सचिव भिरा राना करले रहैं ।
