संगम सहकारीके ११ औं वार्षिक साधारण सभा
पहुरा समाचारदाता
धनगढी, ९ अगहन । धनगढी स्थित संगम बचत तथा ऋण सहकारी संस्थाके लिमिटेडके ११औं वार्षिक साधारण सभा विविध कार्यक्रम करके मनागिल बा ।
जेष्ठ शेयर सदस्य कमलसिंह साउदके वडका पहुनामे हुइल कार्यक्रममे ३० जाने शेयर सदस्यहुकनहे हौसला स्वरुप पुरस्कृत करल रहे । समयके महत्वहे बुझैना समयमे कार्यक्रम स्थल पुग्न शेयर सदस्यहे हौसला स्वरुप पुरस्कार प्रदान करल संगम सहकारी संस्थाके अध्यक्ष मनमोहन विष्ट बटैलै ।
‘सहकारी संस्था नाफा कमाइक लाग स्थापना नइकरजाइठ,’ अध्यक्ष विष्ट कहलै, ‘समाज रुपान्तरण कैना, चेतनाके स्तर बह्रैना, समाजहे शिक्षित बनैनाफ हमार हमार कर्तव्य हो, साधारण सभामे हम्रे शेयर सदस्यहे समयके महत्व बुझाई खोजल हुई, टबमारे समयमे कार्यक्रम स्थलमे पुग्न शेयर सदस्यहे पुरस्किृत करल हुई ।’
संगम सहकारी संस्थासे बार्षिक साधारण सभाके अवसरमे ४ जाने सुत्केरी महिलाहे पौस्टिक आहारके लाग जनही तीन/तीन हजार प्रदान करल बा । ओस्टेक करके संगम सहकारीके शेयर सदस्य बनलपाछे मृत्यु हुइल दुई जाने शेयर सदस्यके आफन्तहे कृया खर्च स्वरुप जनही ३०/३० हजार प्रदान करल अध्यक्ष विष्ट बटैलै ।
अध्यक्ष विष्टके अनुसार संगमसे शेयर सदस्यके लाग हितकोष सञ्चालन करले बा । उ कोषमे आवद्ध रहल सदस्यके परिवारहे सुत्केरी पोषण खर्च, कृया खर्च तथा घातक रोग लग्लेसे उपचारके लाग जनही ५० हजार उपलब्ध करैना करल अध्यक्ष विष्ट बटैलै । बार्षिक साधारण सभाके अवसरमे संगम सहकारीसे उत्कृष्ट कर्मचारी, उत्कृष्ट वचत कर्ता, नियमित फोन पे सेवा लग्न सास्य, उत्कृष्ट ऋणी, उत्कृष्ट जनावी कर्ताहेफे सम्मान करले बा ।
सम्मानित हुइलमे कर्मचारीओर फूलवारी सेवा केन्द्रके बजार प्रतिनिधि धना जोशी, धनगढीस्थित मोतिचोकके बजार प्रतिनिधि पिंयका चौधरी, धनगढी सेवा केन्द्रके बजार प्रतिनिधि देवकी कुमारी पाठक, अत्तरिया सेवा केन्द्रके बजार प्रतिनिधि सरस्वती विष्ट, धनगढी शाखाके लेखा सहायक लालबहादुर चौधरी, आइटी शाखाके गीताकुमारी अवस्थी, बजार इन्चार्ज राधा भण्डारी रहल बटै ।
संगमसे कर्मचारी ओरसे धनगढी शाखाके ऋण अधिकृत कृष्ण प्रसाद भट्टराईहे सर्वोत्कृष्ट कर्मचारीके रुपमे सम्मान करले बा । ओस्टेक करके उत्कृष्ट बचत कर्ताके रुपमे फूलवारी सेवा केन्द्रसे लालबहादुर साउँद, मोतिचोक शाखाके जनार्दन चौधरीहे सम्मान करले बा । कलेसे नियमित फोन पे कर्ताके रुपमे दीपमाला रोकायाहे सम्मान करले बा । ओस्टेक करके उत्कृष्ट जवानीकर्ताके रुपमे संगमसे नारायाणदत्त पन्तहे सम्मान करले बा ।
संगम सहकारी संस्थाके अध्यक्ष मनमोहन विष्टके अध्यक्षतामे हुइल कार्यक्रम सञ्चालन संस्थाके प्रबन्धक बसन्ती कुमारी ऐर बम करल रहिट । संस्थाके उपाध्यक्ष रघुबिर भट्ट कार्यक्रमे स्वागत मन्तव्य, कोषाध्यक्ष हेमराज पाण्डेय लेखा परिक्षण प्रतिवेदन ओ सचिव केदारनाथ भट्टराई संस्थाके चालु आर्थिक बर्षके अनुमानित बार्षिक कार्यक्रम तथा बजेट विवरण प्रस्तुत करल रहिट ।
संस्थाके सम्पति ४७ करोड ४३ लाख संगम बचत तथा ऋण सहकारी संस्थाके कुल पूँजी आर्थिक बर्ष २०७९/८० सम ४७ करोड ४३ लाखसे ढेर पुगल बा । संगम सहकारीके कोषाध्यक्ष हेमराज पाण्डेय प्रस्तुत करल आर्थिक प्रतिवेदन अनुसार गैल आर्थिक बर्षसम संस्थाके कुल सम्पति ४७ करोड, ४३ लाख, ७ सय रहल बा ।
जेम्ने ३ करोड, ११ लाख २५ हजार दुई सय रुपैंया शेयर पूजी, एक करोड ९२ लाख ६७ हजार ५ सय ७० रुपैंयाके साधारण जगेडा कोष, एक करोड, २६ लाख, २९ रुपैंयाके अन्य कोष, एक करोड २५ लाख ५ हजार ५ सय ३२ रुपैंयाके कर्जा जोखिम कोष, २९ करोड ४० लाख, ५६ हजार ४ सय निक्षप, ८ करोड, ३ लाख २२ हजार ८ सय ऋण लगानी ओ दुई करोड ८ लाख ८३ हजार एक सय बराबरका अन्य दायित्वमे रहल कोषाध्यक्ष पाण्डेय प्रस्तुत करल प्रतिवेदनमे उल्लेख बा ।
