लघुवित्तसे विपन्न परिवारके आर्थिक अवस्था सुधार

पहुरा समाचारदाता
धनगढी, ९ अगहन । यूनिक नेपालके कार्यकारी निर्देशक डा. गोपाल दहित लघुवित्त वित्तीय संस्थासे गाउँघरके गरिब तथा विपन्न परिवारके आर्थिक तथा समाजिक अवस्था सुधार हुइल बटैले बाटै ।

शनिच्चरके यूनिक नेपाल लघुविक्त वित्तीय संस्था लिमिटेडके आयोजनामे धनगढीमे हुइल लघुवित्त सम्बन्धी अन्तरत्रिया कार्यक्रममे निर्देशक डा. दहित लघुवित्त वित्तीय संस्थासे विपन्न वर्ग बचत तथा कर्जा सजिले पाइल ओ बचत कैना बानीके विकास हुइल बटैलै ।

‘लघुवित्त तथा वित्तीय संस्थासे गाउँघरके गरिव तथा विपन्न परिवारके आर्थिक तथा सामाजिक विकास हुइल बा’, उहाँ कहलै–‘अब्बे गाउँघरके महिलाहुक्रनके बचत कैना बानी, नेतृत्व विकास सामाजिक सम्मान, करोबारमे पहुँच बह्रनाके साथे स्वास्थ्य शिक्षासे लेके उद्यमी ओ स्वरोजगार बन्टी औरे जनहनहे रोजगारी फेन डेहल बाटै ।’

उहाँ आघे कहलै,‘लघुवित्त तथा वित्तीय संस्थाके कारण गरिव परिवार फेन घर जग्गासे लेके व्यवसाय जोडल ओ गाउँघरके साहु महाजनके महंगा व्याजदरसे छुटकारा फेन पाइल बाटै ।’

लघुवित्त वित्तीय संस्थासे गरिव तथा विपन्न परिवारके आर्थिक सामाजिक रुपमे ढेर योगदान पुगैलेसे फेन वित्तीय संस्थाके कुछ कमीकमजोरीके कारण सक्कु लघुवित्त वित्तीय संस्था बदनाम हुइल पुगल निर्देशक दहित औंल्याइल रहिट ।

उहाँ लघुवित्तके मर्म भावना ओ विधी बिन बुझ्ले संस्था खोलके लघुकर्जा डेना, जिहीहे फेन केन्द्र ओ समूहमे रख्ना, लघुवित्तीय साक्षरता नैडेना ओ दुईचार जनहनके समूहहे फेन ढेर कर्जा प्रवाहसे सक्कु लघुविक्त वित्तीय संस्थाके बदनाम हुइल बटैलै ।
कार्यत्रममे संस्थाके तालिम सेक्सन फ्रमुख मान बहादुर चौधरी संस्थाके अवस्थाबारे जानकारी कराइल रहिट ।

कार्यक्रम संस्थाके अध्यक्ष शिव बहादुर चौधरीके अध्यक्षतामे हुइल रहे । कार्यत्रममे सञ्चालक समिति सदस्य सन्तराम धरकटुवा, पुरन चौधरी, बालिका चौधरी, घोडीघोडा लघुवित्त वित्तीय संस्थाके पूर्व अध्यक्ष प्रभात कुमार चौधरी लगायतके पहुना रहल रहिट ।

कार्यक्रममे संस्थाके संस्थापक शेयर धनी तथा सरोकारवालाहुक्रनके उपस्थिति रहल रहे ।