धनगढी उपमहानगरसे शव चिस्यान सेवा सञ्चालन

पहुरा समाचारदाता
धनगढी, ११ अगहन । कैलालीके धनगढीमे दुईठो निःशुल्क शव चिस्यान सेवा सञ्चालनमे लानल बा । धनगढी उपमहानगरपालिकासे २ लाख २२ हजार रुपैयाँके खर्चमे दुईठो निःशुल्क शव चिस्यान सेवा सञ्चालनमे लानल हो ।

नगरप्रमुख गोपाल हमाल विदेशमे रहल आफन्तके पर्खाइमे ढेर दिनसम राखे पर्र्ना मृतक शरीरके सुरक्षाके लाग शव चिस्यान सेवा सञ्चालनमे लानल बटैलै । उहाँ कहलै, धनगढी उपमहानगरपालिकाहे कल्याणकारी बनैटी गैल बाटी । नागरिकहे प्राथामिकतामे राखके काम कैटी आइल बाटी । हमार डाडाभैया वैदेशिक रोजगारीमे रहल बाटै । डाइबाबाक सुखके लाग उहाँँहुक्रे विदेश जैना करल बाटै । मृत्युहे टे राके नैसेकजाइ । मने, उहाँहुक्रे आपन डाइबाबाके अनुहार समेत हेरे नैपैठै । उहे मारे हम्रे चिस्यान सेवा सुरु करले बाटी ।’

धनगढी उपमहानगरपालिकाके अनुसार नगर प्रहरी चिस्यान सेवा आवश्यक परल घरसम लैजैना बाटै । चिस्यानमे मृतकके शरीर रख्ना सहयोग कैना बावै । विद्युतसे सञ्चालन हुइना चिस्यान सेवा उपमहानगरपालिकाके गाडीमे घरसम पुगाजैना बा ।

धनगढी उपमहानगरपालिकाके उपप्रमुख कन्दकला कुमारी राना अन्तिम दर्शनके लाग चिस्यान सेवामे शव सुरक्षित रख्ना सहयोग करल बटैली । उहाँ शव चिस्यान सेवाहे निरन्तरता डेना बटैली ।

‘नीति तथा कार्यक्रममे हम्रे चिस्यान सेवा राखल रही । हम्रे सुरुवात करले बाटी । विदेश वा घरसे डुर रहल परिवारके सदस्य आइटसम मृतक शरीरके सुरक्षाके लाग चिस्यान सेवा सुरु करल हुइटी ।’ गर्मीमे मृतकके शव बचैना समस्या हुइना करल बटैली । चिस्यान सेवासे सक्कु जनहनहे जीवनके अन्तिम पटक मृतकके अनुहार हेरे पैनामे सहयोगी हुइना उहाँ बटैली ।

धनगढी उपमहानगरपालिकासे विपन्न वर्गहे काठदाउर ओ किरिया खर्चके लाग समेत पाँच हजार डेना करल बा । परिवारके सदस्यके मृत्यु हुइलपाछे नगर प्रहरीहे खबर करलपाछे पाँच हजार घरसम पुगैना करल बा ।