कैलारीमे एकिकृत प्रारम्भिक बालविकास कार्यविधि मस्यौदा जारी

पहुरा समाचारदाता
हसुलिया, ११ अगहन । कैलारी गाउँपालिकामे एकिकृत प्रारम्भिक बालविकास कार्यविधि २०८० के मस्यौदा जारी कैगिल बा ।

कार्यविधि निर्माणके लाग जनप्रतिनिधि ओ टमान शाखाके प्रमुखहुकनसे हुइल दुई दिने परामर्शपाछे सोम्मारके रोज उ मस्यौदा जारी कैगिल हो । कैलारी गाउँपालिकाके आयोजनामे सेतो गुराँस राष्ट्रिय वालविकास सेवाके प्राविधिक सहयोग ओ यूनिसेफके सहयोगमे ‘नेपालमा प्रारम्भिक बाल शिक्षा र विकासको सवलीकरणका लागि प्रारम्भिक सिकाई तथा विका मापदण्ड कार्यान्वयन परियोजना’ अन्र्तगत स्थानीय तहमे प्रारम्भिक वाल विकास कार्यविधि निर्माणके परामर्श कैगिल रहे ।

गाउँपालिका अध्यक्ष राजसमझ चौधरीके अध्यक्षतामे हुइल समापन कार्यक्रममे उ कार्यविधि यिहे हिउँदे अधिवेशनमे पास कैना जनैलै । प्रारम्भिक बालविकास कार्यविधिके गाउँपालिकाके सम्पतिके रुपमे रना ओरसे विद्यायन समितिहे यकर विषयमे छलफल आघे बह्रैना निर्देशनफे डेलै ।

प्रारम्भिक बालविकास कार्यविधि निर्माण हुइलेसे मार्ग निर्देशकके रुपमे रही,’ गाउँपालिका अध्यक्ष कहलै, ‘अब्बे सामुदायिक ओ संस्थागत विद्यालय विच दुरी बा । सामुदायिक विद्यालयमे मजासे पह्राई नइहुइठ कना अभिभावक जनगुनासो बा । अभिभावक मन जिटे नइसेक्गिल हो । बाल विकासके सफलता हासिल करसेकलपाछे अभिभावकके मन जिटे सेक्जाई ।’
सामुदायिक विद्यालयमे गुणस्तरीय शिक्षा नइडेठै कना मानसिकता बा, उहीहे चिरना आवश्यक बा, गाउँपालिका अध्यक्ष कहलै । कैलारीमे प्रारम्भिक बालविकास कार्यविधि निर्माण हुइलेसे ठप शैक्षिक सुधार हुइना उहाँ बटैलै ।

कार्यक्रममे कैलारी गाउँपालिका वडा नम्बर २ वडा अध्यक्ष तथा विद्यायन समिति संयोजक विकास चौधरी उ कार्यविधि टमान शाखासे छलफल करके अन्तिम रुप डेटी कार्यपालिका बैठकमे पेश कैना बटैलै ।

कार्यक्रममे प्रारम्भिक बालविकास कार्यविधि निर्माण विज्ञ सहजकर्ता मोहनराज निरौला सहजीकरण करल रहिट । कार्यक्रममे उहाँ एकीकृत प्रारम्भिक बालविकास कार्यक्रम संचालन कार्यविधिके अर्थ, उद्देश्य, औचित्य ओ निर्माणके प्रक्रिया चरणबारे जानकारी डेहल रहिट ।

दुई दिने परामर्शपाछ कैलारी गाउँपालिकाके एकीकृत प्रारम्कि बालविकास कार्यक्रम संचालन कार्यविधि २०८० के मस्यौदा जारी हुइल बा । कार्यक्रमममे सेतो गुराँस राष्ट्रिय वालविकास सेवाके अनुगमन मुल्याङकन अधिकृत पदम लिम्बुफे सहजीकरण करल रहिट ।

कार्यक्रममे कैलारी गाउँपालिकाके वडा नम्बर १ के वडा अध्यक्ष धोजहरिपाल बोहरा, वडा नम्बर २ के वडा अध्यक्ष विकास चौधरी, वडा नम्बर ३ के वडा अध्यक्ष सन्तराम चौधरी, वडा नम्बर ४ के वडा अध्यक्ष ठागुराम चौधरी, वडा नम्बर ५ के वडा अध्यक्ष विष्णु प्रसाद चौधरी, वडा नम्बर ६ के वडा अध्यक्ष प्रेम बहादुर चौधरी, वडा नम्बर ७ के वडा अध्यक्ष दिपेन्द्रबहादुर बम, वडा नम्बर ८ वडा अध्यक्ष तारामल कठरिया, वडा नम्बर ९ के वडा अध्यक्ष खेमराज चौधरी, कार्यपालिका सदस्यहुक्रे, प्रमुख प्रशासकीय अधिकृत विर बहादुर ऐर, शिक्षा शाखा प्रमुख गणेश प्रसाद मिश्रा, योजना शाखा प्रमुख सन्तोषकुमार चौधरी, पशु शाखा प्रमुख सूर्य प्रसाद चौधरी, कृषि शाखा प्रमुख मैया चौधरी, महिला तथा वालबालिका शाखा प्रमुख बालकु्मारी चौधरी, पन्जिकरण शाखाके प्रमुख दयाराम चौधरी, आइटी शाखा प्रमुख रविन्द्र चौधरी, सेतो गुराँस राष्ट्रिय वालविकास सेवा कैलारी गाउँपालिका प्रमुख सुरज परियारलगायतके सहभागिता रहल रहे । कार्यक्रमके संचालन सामाजिक विकास शाखा प्रमुख यगम कलेल करल रहिट ।