मुक्तकमैयाके १२ परिवारहे सुरक्षित आवास
पहुरा समाचारदाता
धनगढी, १२ अगहन । कैलालीके घोडाघोडी नगरपालिका–३ सृष्टिनगर मुक्त कमैया बस्तीके नागरिकहे सुरक्षित आवास हस्तान्तरण कैगिल बा ।
सीमान्तकृत वर्गके १२ परिवारहे मंगरके रोज सुरक्षित आवास हस्तान्तरण कैगिलक हो । घोडाघोडी नगरपालिकाके नगर प्रमुख खडकबहादुर रावत उ परिवारहे एक कार्यक्रमबिच आवास हस्तान्तरण करल रहिट । कार्यक्रममे सम्बोधन करटी उहाँ विपन्न समुदायके उचित बसोबासके लाग आवास निर्माणके साथे शिक्षा, स्वास्थ्य, खानेपानी, तथा सिँचाई जैसिन सक्कु क्षेत्रमे प्रमुख प्राथमिकताके साथ नगरपालिकासे काम करल उल्लेख करलै ।
निस्सा पाइल सुकुम्वासी, दलित परिवारहे हाली लालपुर्जा डेनाफे उहाँ बटैलै । अन्य वडामेफे मुक्त कमैया बस्तीके नागरिकहे सुरक्षित आवास निर्माण कैना उहाँक कहाई रहे ।
सृष्टिनगर मुक्त कमैया बस्तीमे दुई ठो पक्की कोठा ओ चर्पीरहल १२ ठो आवास निर्माण कैगिल बा । निर्माण करल घर पाइलपाछे वहाँके सीमान्तकृत वर्गके समुदाय खुसी हुइल बटै । वडा नम्बर ३ के विशेष समन्वयमे घोडाघोडी नगरपालिकाके ४२ लाख, सुरक्षित आवास परियोजना ह्याविट्याट÷राष्ट्रिय दलित नेटवर्क नेपालसे २४ लाख रुप्या लागतमे सुरक्षित आवास निर्माण करल रहे ।
कार्यक्रममे उप प्रमुख गुलियाकुमारी चौधरी सुकुम्वासी, आदिवासी ओ पिछडा समुदायके जीवनस्तर उकास्न नगरपालिका लग्टी रहल बटैली । पालिकासे सीपमूलक स्वरोजगार कार्यक्रम ल्यानल बटैटी उप प्रमुख चौधरी यकर माध्यमसे उत्पादन स्वरोजगारमे आघे बह्रैना बटैली ।
सुरक्षित आवास हस्तान्तरण कार्यक्रममे प्रमुख प्रशासकीय अधिकृत, वडा अध्यक्ष, वडा सदस्य, टमान राजनीतिक दलके प्रतिनिधि, हयाविटयाट् नेपाल प्रतिनिधि, राष्ट्रिय दलित नेटवर्कके प्रतिनिधि ओ लाभग्राही समुदायके उपस्थिति रहल रहल रहे ।
