नक्कली किसान आब अनुदान नैपहीः मन्त्री चौधरी

पहुरा समाचारदाता
धनगढी, १६ अगहन । सुदूरपश्चिम प्रदेश सरकारके भूमि व्यवस्था कृषि तथा सहकारी मन्त्रालयके माननीय मन्त्री रामेश्वर चौधरी नक्कली किसानहे अनुदान प्याकेज नइडेना बटैले बटै ।

कैलाली जिल्लाके धनगढी उपमहानगरपालिका–७ स्थित दाइजो कृष्षि सहकारी संस्था लिमिटेडके शनिच्चरके रोज हुइल १२औं बार्षिक साधारणसभाके उदघाटन कैटी उहाँ विगतके दिनमे कागजातहे बल्गर बनाके अनुदान प्याकेज नक्कली कृषक लजैना करल मने, आबसे नक्कली किसान अनुदान नइपैना बटाइल रहिट ।

मन्त्री चौधरी कहलै, ‘मै फे कृषक समुदायसे अइलक व्यक्ति हुँ । कृषकहुकनके मर्म दुःख कष्ट मही पत्ता बा । मन्त्रालयसे कृषकहुकन सहजुल टमान कार्यक्रम लागु हुइल बा । बास्तविक किसान समयमे सम्पर्क बह्रैना जरुरी बा ।’
कैलालीमे बृहत मकै, थारु आलु कार्यक्रम बा, बिउँ उत्पादन कार्यक्रमफे रहे । अब्बे मन्त्रालयसे हाली थारु उत्थान कार्यक्रमफे लागु हुइना मन्त्री चौधरी बटैलै ।

सहकारी संस्था ब्याज खैना संस्था नइहो यी कृषिमे लगानी कैना, कृषकहे सुबिधा डेना हो,’ उहाँ कहलै, ‘ढेर सहकारी दलालके कारण ओ दिनप्रतिदिन सुशासनके कमि कमजोरीसे डुब्टी रहल उहाँ बटैलै । मने यी सहकारीके वार्षिक प्रतिवेदन हेरेबेर दनप्रतिदिन प्रगति करटी हुइटी गैल बा ।’मन्त्रालयके ओरसे अइना दिनमे सहयोग का–का करे सेक्जाईं ओम्ने जोड डेना मन्त्री चौधरी प्रतिबद्धता जनैलै ।

धनगढी–७ के वडा अध्यक्ष मोती रानाथारु यी संस्थासे यहाँके किसानसंगे व्यवसायी फे लाभान्वित रहल बटैलै । कृषकहे रासायनिक मल ओ कृषि यन्त्र उपलब्ध कराइलपाछे कृषि कार्यमे सहजुल हुइल उहाँ बटैलै । उहाँ कृषि योग्य जमिन घर घडेरीमे परिणम हुइटी गैल ओरसे ृषि योग्य जमिनहे बाँचैटी रख्न आग्रह करलै ।

संस्थाके अध्यक्ष मानबहादुर रानाथारुके अध्यक्षतामे हुइल कार्यक्रममे कृषि ज्ञान केन्द्रके कामना कार्की, सहकारीके कानूनी सल्लाहकार कृष्णप्रसाद सुुवेदी, शिक्षा समिति संयोजक मनराज यादवलगायत मन्तव्य करल रहिट । कार्यक्रमके संचालन संस्थाके सचिव दिपकराज जोशी ओ स्वागत मन्तव्य पूर्व अध्यक्ष चन्द्रकिरण राना करल रहिट ।

दाइजो कृषि सहकारी संस्था लि. का सचिव दिपकराज जोशी वार्षिक प्रतिवेदन प्रस्तुत करटी संस्थाके शेयर पुजी ६० लाख २३ हजार, शेयर सदस्य संख्या ६०६ जाने ओ जगेडा कोषमे ८ लाख ९१ हजार ४ सय २२ रुप्या रहल जनैलै । ४ करोड २५ लाख ५४ हजार ७ सय ७६ रुपैया निक्षेप संकलन रहल बा । ३ करोड २३ लाख ६८ हजार ७ सय ८७ रुपैया ४ पैसा ऋण लगानी रहल बा । संस्थाके बचत रु. ४ करोड २५ लाख ५४ हजार ७ सय ७६ रुपैया ७५ पैसा बा ।

सहकारी संस्था लि.के आ.व. २०७९÷०८० के वासलात ५ करोड ६० लाख ४० हजार ९ सय ५ रुप्या ५५ पैसा बराबर रहल सहकारी संस्था लि. के लेखा समिती संयोजक नन्दगोपाल राना लेखा परीक्षण प्रतिवेदन प्रस्तुत करल रहिट । ०८०÷०८१ के अनुमानित रकम ब्यवस्थापक बासुदेव राना प्रस्तुत करल रहिट ।

कार्यक्रममे संस्थाके निवर्तमान अध्यक्ष चन्द्रकिरण राना, बचतकर्ता रामफुल राना, जोगिराम राना, असल ऋणी लालबहादुर राना, आगनबारी मिडिया प्रा.लि.के पत्रकार दिनेश राना सम्मानित हुइल बटै ।