उद्यममे जमलैं अपांगता युवा

मुकेश चौधरी
धनगढी, १७ अगहन । घोडाघोडी नगरपालिका वडा नम्बर १२, कोटाका प्रदेशु डगौराथारु शारिरिक रुपमे अपांगता रहल व्यक्ती हुइट । मने उहाँ अपनहे अपन उमेरके सग्गे युवाहुकनसे सशक्त रुपमे ठरहयाइना सफल हुइल बटै ।

उहाँक दुनु गोर नइचलठ । उहाँ गाउँमे मोबाइल ग्यालरी सञ्चालन करके महिनाके ५० से ६० हजार रुप्या आम्दानी करटी आइल बटै । मोबाइल मर्मत तालिम लेके १० वर्षसे गाउँक त्रिवेणी बजारमे मोबाइलके एसोसेरिज सामाग्री विक्री ओ मर्मत कैना पसल सञ्चालन करटी रहल बटै । शुरुमे एक लाख रुप्या लगानी करके पसल शुरु करल प्रदेशुके पसलमे अब्बे १० लाख रुप्या लगानी पुगल बा । पसलसे सक्कु खर्च कटाके मासिक १० से १५ हजार रुप्या खुद नाफा हुइना करल उहाँ बटैलै ।

घोडाघोडी नगरपालिका वडा नं. १, सुख्खडके छविलाल चौधरी फे सफल किसान ओ उद्यमीमे परठै । शारीरिक रुपमे अपांग हुइलेसेफे उहाँसंग युवासे उदाहरणीय कार्य करके चर्चित बनल बटै । उहाँ अपने घरमे कस्मिर बेटबाँस फर्निचर उद्योग ओ कृषि फर्म चलैले बटै । उहाँ बेटबाँस फर्निचर उद्योगमे दुई जनहनहे रोजगारी डेहल बटै । फर्निचर उद्योगसे उहाँ टेबल, सोफा, मुडा, कुर्सी, ह्यांगर, फूलदानी, स्ट्याण्ड, ¥याक लगायतके सामाग्री उत्पादन कैना करल बटै कलेसे कृषि फर्मसे च्याउ उत्पादन कैना करल बटै ।

४ लाख रुप्या लगानी करके सञ्चालन करल फर्निचर उद्योगसे उत्पादित मध्ये दैनिक २ से ४ सेट फर्निचर विक्री हुइना करल छविलाल बटैलै । उहाँ कैलालीके सत्ति सामुदायिक वनसे बेट खरिद करके फर्निचर बनैना करल बटै । पछिल्का आर्थिक मन्दीसे उद्योगके व्यापार सुस्ताइल छविलाल बटैलै । उहाँ कोभिड १९ से पहिले उद्योगमे चार जहनहे रोजगारी डेहल रहिट । विक्री घटलपाछे उत्पादनफे कमी आके दुई जाने केल मिस्त्री धारल उहाँ बटैलै ।

उद्योगसे उत्पादन हुइल सामान विक्री ओ च्याउ फर्ममे उहाँ अपनही काम कैना करल बटै । उहाँ कृषि फर्मसे उत्पादन हुइल अन्य टिना, बेम्टी ओ बदाम खरिद करके भुटके अपनही विक्री कैना करल बटै । उहाँ घुम्ती पसल मार्फत् गाउँ गाउँ जाके सामान विक्री कैना करल बटैलै ।

यी युवा अपांग हुइलेसेफे स्वरोगार उद्यम करल उदाहरण हुइट । ओस्टेक करके, कैयौं युवा उद्यम करके अपने स्वरोजगार केल नइहुके कैयौं युवाहुकनहे रोजगार समेत डेहल राष्ट्रिय अपांग महासंघ नेपालके सुदूरपश्चिम प्रदेश अध्यक्ष मानबहादुर साउँद बटैलै । उहाँ ओसिन युवाहुक्रे करल उद्यमसे उत्पादन सामाग्रीके प्रचारप्रसार तथा बजारीकरण कैना आवश्यक हुइनाके साथे उ युवासे करल उद्यमके विषयमे उजागर करके अन्य युवाहुकनहेफे उद्यममे लग्ना प्रोत्साहित करे पर्ना बटैलै ।