परियोजनाके गतिविधि अनुगमन तथा सामाजिक लेखा परिक्षण

पहुरा समाचारदाता
धनगढी, १९ अगहन । मुक्तकमैया महिला विकास मञ्चसे ‘कैलाली र कञ्चनपुर जिल्लाका मुक्त कमैयाहरुको सामाजिक, आर्थिक अधिकार प्रवद्र्धनका लागि साझेदारी कार्यक्रम’के अनुगमन कैगिल बा ।

एफ.सि.ए. नेपालके आर्थिक सहयोग गोदावारी नगरपालिकाके वडा नम्बर ३ ओ १० के मुक्तकमैया बस्तीमे संचालित टमान गतिविधिके अनुगमन कैगिल हो । मुक्तकमैया महिला विकास मञ्चके कार्यक्रम संयोजक इन्द्र चौधरी वडा नम्बर ३ मालाखेतीमे १४ जाने बंगुर पालन, २० जाने लोकल मुरगी पालनमे सहयोग करल बटैलै ।

ओस्टेक वडा नम्बर १० खमौरामे २ जनहन ओ डमौरामे ३ जनहनहे व्यावसायिक टिना खेतीके लाग सहयोग कैगिल उहाँ जनैलै । व्यावसयिक टिना खेती, बंगुर पालन ओ लोकल मुरगी पालनके गोदावारी नगरपालिकाके उपप्रमुख शारदा देवी रोकाय, सामाजिक विकास शाखा प्रमुख ज्ञानेन्द्र कुमार भट्ट, पशु विकास शाखा प्रमुख रामबहादुर सार्की, महिला तथा बालबालिका शाखा प्रमुख गोदावरी खत्री, मुक्त कमैया महिला विकास मञ्चके अध्यक्ष सीमा चौधरी, कार्यक्रम संयोजक इन्द्र चौधरी, सहजकर्ता राकेश चौधरी, शारदा चौधरीलगायतसे अनुगमन कैगिल बा ।

ओस्टेक करके कैलाली र कञ्चनपुर जिल्लाका मुक्त कमैयाहरुको सामाजिक, आर्थिक अधिकार प्रवद्र्धनका लागि परियोजनाके सामाजिक लेखा परिक्षण कैगिल बा । उ कार्यक्रममे मञ्चके कार्यक्रम संयोजक इन्द्र चौधरी परियोजनासे करल गतिविधिके जानकारी डेहल रहिट । उ परियोजनासे जोखिममे परल मुक्तकमैया परिवारके सीपविकास हुके उद्यमशिलता बह्रना, सहकारी बल्गर हुके सामाजिक रुपान्तरणके वकालत कैना सक्षम हुइना, मुक्तकमैया बालबालिका गुणस्तरीय शिक्षा पैना, जोखिममे परल समुह अधिकार ओ पहुँचके लाग वकालत कैना सक्षम हुके ३ ठो सहकारीमे नयाँ उपसमिति गठन हुइना बटैलै । ओस्टेक उहाँ कार्यक्रममे गोदावरीके वडा नम्बर ८ मे टमान गतिविधि संचालन करल बटैलै ।

कार्यक्रममे गोदावरी नगरपालिकाके उप प्रमुख शारदा देवी रोकाय संस्थासे देहल सीप ओ लगानीहे निरन्तरता डेना आग्रह करली । उहाँ कहली, संस्था आघे बह्रना डगर डेखैले बा । अपनेहुक्रे मजासे नेंग्बी टे गन्तव्यमे पुग्बी । मन लगाके नइचल्बी गन्तव्यमे पुगे नइसेक्बी । महिला सक्षम हुइलेसे चाहल ठाउँमे पुगे सेक्ना कहटी महिलाहुक्रनहे सीपके सदुपयोग करटी आयआर्जनमे बह्रना उहाँ आग्रह करली । मुक्तकमैया महिला विकास मञ्चके अध्यक्ष सीमा चौधरी लगानीहे खेर नइफेक्ना आग्रह करली । कार्यक्रममे टमान मुक्तकमैया बस्तीके महिलाहुकनके सहभागिता रहल रहे ।