घोडाघोडी ओ कैलाली विजयी

पहुरा समाचारदाता
धनगढी, २० अगहन । कैलालीके धनगढीमे जारी लिटल फ्लावर प्रिमियर लिग (एलपीएल) मे बुधके घोडाघोडी क्रिकेट एकेडेमी ओ कैलाली जिल्ला क्रिकेट क्लब विजयी हुइल बावै ।

पहिल खेलमे घोडाघोडी क्रिकेट एकेडेमी लिटल फ्लावर स्कुलहे ४१ रनसे हराइल रहे । घोडाघोडीसे डेहल १२८ रनके लक्ष्य पछ्याइल लिटल फ्लावर १६.५ ओभरमे सक्कु विकेटके क्षतिमे ८६ रन बनाइल रहे । उहीसे आघे टस जितके पहिले ब्याटिङ करल घोडाघोडी क्रिकेट एकेडेमी १९.५ ओभरमे सक्कु विकेटके क्षतिमे १२७ रन बनाइल रहे ।

ओस्टके औरे खेलमे कैलाली जिल्ला क्रिकेट क्लब खप्तड इन्डोर स्पोर्ट्स ट्रेनिङ सेन्टरहे ३४ रनसे हरैले बा । कैलालीसे डेहल १४० रनके लक्ष्य पछ्याइल खप्तडसे १७.४ ओभरमे सक्कु विकेटके क्षतिमे १०५ रन बनाइल रहे ।

उहीसे आघे टस जितके ब्याटिङ करल कैलाली जिल्ला क्रिकेट क्लबसे २० ओभरमे सात विकेटके क्षतिमे १३९ रन बनाइल रहे । आठौँ संस्करणके इ प्रतियोगितामे १६ टोलीके सहभागिता रहल बा । प्रतियोगिताके उपाधि विजेता दुई लाख ५५ हजार ओ उपविजेता एक लाख २८ हजार रुपियाँ पुरस्कार पैना बाटै ।