बनुवा वन्यजन्तु मानव जीवनसे जोरल बाः गापा अध्यक्ष

पहुरा समाचारदाता
हसुलिया, २० अगहन । बसन्ता वनक्षेत्र सामुदायिक वन उपभोक्त समुह समन्वय समिति कैलारी–३ सुर्मीनालाके १५औं बार्षिक साधारण सभा बुधके रोज सम्पन्न हुइल बा ।

कैलारी गाउँपालिका अध्यक्ष राजसमझ चौधरीके वडका पहुनामे हुइल उदघाटन कार्यक्रममे उहाँ बनुवा, बन्यजन्तु मानव जीवनसे जोरल ओरसे यकर संरक्षण सम्बद्र्धन आवश्यक रहल बटैलै । उहाँ कहलै, रुखुवा, बोट विरुवा प्रकृतिहे सन्तुलन बनैटी मानवके लाग चाहल अक्सिजन प्रदान करठ । अक्सिजन नइरहलेसे मानव एक घाचिकफे बाँचे नइसेक्ही ।’

बनुवामे रहल बन्यजन्तु चोरी शिकारीके कारण लोप हुइटी गैल, मानव ओ बन्य जन्तु विच द्वन्दफे बह्रटी गैल उहाँ बटैलै ।
कोभिड–१९ के स्मरण करैटी उहाँ अक्सिजन नइपाके ढेर जाने अकालमे ज्यानफे गुमाइल बटैलै । पृथ्वी दिनदिने गरम हुइटी गैल कहटी रुखुवा बरिखवाहे संरक्षण करे नइसेक्लेसे गर्मी बह्रके यी क्षेत्रफे मरुभुमिमे परिणत हुइल गाउँपालिका अध्यक्ष बटैलै । उहाँ गाउँपालिकाके खाली क्षेत्रमे बृक्षारोपणके लाग डिभिजन वन कार्यालय लगायत टमान ठाउँमे टेलुवा उत्पादन ओ निशुल्कमे टेलुवा वितरण करलफे बटैलै ।

छाडा पशु चौपायाके कारण किसान हैरान रहल ओ उपभोक्ताके माग अनुसार निर्माण हुइटी रहल काँजी हाउस स्थानीय सरकारहे विना जानकारी तोडफोड मजा नइरहल बटैलै । उहाँ कहलै, स्थानीय सरकारके लगानीमे हुइना कार्यके अवरोध हुइटी बा । कोई अवरोध करटा कलेसे आघे जानकारी कराई, समन्वय कैना आवश्यक बा । सामुदायिक वनफे स्थानीय तहभिटर रहल ओरसे समन्वय करके आघे बह्रे पर्ना जरुरी बा ।’

सामुदायिक वन गापासंग समन्वय नइकरके एकलौटी बह्रलेसे गाह्रो हुइनाफे उहाँ बटैलै । उहाँ बसन्ता वनक्षेत्र सामुदायिक वन उपभोक्त समुह समन्वय समितिके १५औं बार्षिक साधारण सभाके शुभकामना व्यक्त करटी सदैव सहयोग कैना प्रतिवद्धता जनैलै ।

वन वातावरण तथा विपद व्यवस्थापन समिति संयोजक तथा वडा नम्बर ४ के वडा अध्यक्ष ठागुराम चौधरी सामुदायिक वन भिटर टमान खाले विवाद रहल बटैलै । उहाँ नेपालमे केल नाही नेपालीहुक्रे भारतहे टमान मेरिक सहयोग करल मने उहाँके वन विभागसे नेपालीनहे दुःख डेहल बटैलै ।

कार्यक्रममे विशिष्ट पहुना सवडिभिजन वन कार्यालय बसन्ताके प्रमुख श्याम सुन्दर माझीलगायत मन्तव्य व्यक्त करल रहिट ।
१५औं बार्षिक साधारण सभा संस्थाके अध्यक्ष रमेश चौधरीके अध्यक्षतामे हुइल रहे । कार्यक्रममे उहाँ कैलारी गाउँपालिकाभिटर तीन ठो सिएसिसि रहल ओ अइना दिनमे सक्कु सामुदायिक वनहे एक्के सिएसिसिमे नन्ना जोड डेलै । उहाँ तालतलैया मर्मत करेबेर पर्यटकहुकन भित्रैना मेरिक बनाई पर्नाफे बटैलै ।

कार्यक्रममे विशिष्ट पहुनामे थारु कल्याणकारिणी सभाके केन्द्रीय सदस्य रामचरण चौधरी, पहुनामे वडा नम्बर ३ के वडा अध्यक्ष सन्तराम चौधरी, वडा नम्बर ७ के वडा अध्यक्ष दिपेन्द्रबहादुर बम, नेपाली काँग्रेस क्षेत्र नम्बर ३ के सभापति तथा बुद्धिजीवि कृष्ण प्रसाद चौधरी, बसन्ता सिएसिसिके सल्लाहकार भरतराम चौधरी, बसन्ता सिएसिसिके लेखा अनुगमन संयोजक तथा कोषाध्यक्ष पवित्री चौधरी, बसन्ता सिएसिसिके लेखा अनुगमन सदस्य लक्ष्मी प्रसाद चौधरी, संस्थाके व्यवस्थापक दुलिराम चौधरी, पारदर्शि महिला बहुउद्देश्यीय सहकारी संस्थाके अध्यक्ष गीता चौधरी, वडका बनुवा दुना टपरी तथा हस्ताकला उद्योग सुर्मिनाला कैलालीके संयोजक लक्ष्मण प्रसाद चौधरी, चोरी सिकारी नियन्त्रण इकाई संयोजक भुलुराम चौधरी ओ इलाका प्रहरी कार्यालय हसुलियाके प्रमुख राजेन्द्रसिंह कार्की लगायतके पहुना रहल रहिट ।

कार्यक्रमक संचालन संस्थाके लेखापाल सन्दिप चौधरी ओ स्वागत मन्तव्य सदस्य सीतादेवी चौधरी करल रहिट ।