कैलारीमे उपाध्यक्षसंग पोषण विशेष कार्यक्रम सुरु

पहुरा समाचारदाता
हसुलिया, २१ अगहन । कैलालीके कैलारी गाउँपालिकामे सुत्केरी हुइल महिलाहुकनके लाग उपाध्यक्षसंग पोषण विशेष कार्यक्रम सुरु हुइल बा ।

गाउँ पालिका अन्तर्गतके स्वास्थ्य संस्थामे सुत्केरी हुूइल महिलाहुकनके लाग उपाध्यक्षसंग पोषण विशेष कार्यक्रम अन्तर्गत विफेक रोज वडा न ३ के टिसिएनसे ७७ जाने सुत्केरी महिलाहुकन कोसेली (पोषण सामाग्री तथा हाइजिन किट) हस्तान्तर करके सुरुवाट कैगिल हो ।

गाउँपालिकाके उपाध्यक्ष भगवतीकुमारी चौधरीके वडका पहुनामे वडा नम्बर ३ से सुत्केरी हुइल महिलाहुकनके लाग उपाध्यक्षसंग पोषण विशेष कार्यक्रम सुरु हुइल बा । कार्यक्रममे बोल्टी उहाँ कहली, अपने गैल बरसफे यी कार्यक्रम लागु करल ओ यी निरन्तरता डेहल बटैली । महिला सुत्केरी हुइलपाछे ढेर चिजके समस्या आइठ । डाईसंग संगे बच्चाके स्वास्थ्य मजा होए कहिके यी कार्यक्रम लागु यी बरसफे करल हो ।ֹ

कार्यक्रमके विशिष्ट पहुना कैलारी गाउँपालिका वडा नम्बर ३ के अध्यक्ष सन्तराम चौधरी रहल रहिट । उहाँ कहलै, पालिकासे नानल सुत्केरी महिला हाइजिन किट, पोषण किट ओ बच्चा किट उपहार योजनासे डाई ओ लर्कनके स्वास्थ्यमे टेवा पुगी ।’ पोषणयुक्त खाना नइपाके ढेर जैसिन बच्चा कुपोषण हुइटी रहल ओरसे यी कोसेलीसे उही पुर्ति कैनाफे सहयोग मिल्ना उहाँ बटैलै ।

कैलारी गाउँपालिकाके स्वास्थ्य शाखा प्रमुख नरेशकुमार चौधरी सुत्केरी हुइल महिलाहुकनके लाग उपाध्यक्षसंग पोषण विशेष कार्यक्रम सक्कु वडामे लागु हुइना बटैलै ।

सावन महिनासे अगनह महिनासम लर्का जन्माइल सक्कु लरकोरिया डाईहे उ समान डेटी रहल स्वास्थ्य शाखा प्रमुख बटैलै । ओस्टेक अगहनपाछे सुत्केरीहे चैतमे ओ चैतपाछेक सुत्केरीहे असार मसान्तमे उ समान डेना उहाँ बटैलै । उपाध्यक्षसंग पोषण विशेष कार्यक्रम अन्र्तगतके कोसेली झोलामे सुत्केरी डाईक लाग हाइजिन किटमे (व्याग, ब्रस टुथपेष्ट, नोह कटनी, साबुन, सेनेटरी प्याड), बच्चा किटमे बेबी सोप, बेबी स्याम्पु, क्रिम, तेल) ओ पोषण सामाग्रीमे पाँच सय ग्राम घिउ, अण्डा ३० पिस, काजु १०० ग्राम ओ बदाम १०० ग्राम रहल बा ।