अपाङता रहल व्यक्तिनहे स्वास्थ्य पुनस्र्थापना सेवा डेना प्रतिवद्धता
पहुरा समाचारदाता
धनगढी, २१ अगहन । अपाङता रहल व्यक्तिहुकनहे स्वास्थ्य पुनस्र्थापना सेवा डेना सुदूरपश्चिम प्रदेशके सरोकारवाला निकायसे प्रतिवद्धता जनैले बटै ।
राष्ट्रिय अपाङता महासंघ सुदूरपश्चिम प्रदेशके आयोजना ओ. एचआइ÷यूएसएडके साझेदारीमे संचालित रिहयाव परियोजना अन्तर्गत स्वास्थ्य पुनस्र्थापना सेवा सम्बन्धमे करल अन्तरक्रिया कार्यक्रममे प्रदेशस्थित सरोकारवाला निकायसे उ प्रतिवद्धता जनाइल हुइट ।
सुदूरपश्चिम प्रदेशके सामाजिक विकास मन्त्रालय स्वास्थ्य महाशाखाके निमित्त निर्देशक नरेन्द्रसिंह कार्की अपाङता रहल व्यक्तिहुकनके पहँुच बह्रैना खालके कार्यक्रम नन्ना प्रतिवद्धता जनैले बटै । राष्ट्रिय अपाङता महासंघ ओ सुदूरपश्चिम प्रदेश सरकार विच हुइल पाँच बुँदे सहमतिमे मन्त्रालयसे सेकटसम कार्यान्वयनओर लैजैना उहाँ बटैलै ।
आर्थिक मामिला मन्त्रालयके शाखा अधिकृत कमला शाही अपाङता रहल व्यक्तिहुकनहे क्षमताके आधारमे अवसर डेहे पर्ना बटैली । आर्थिक मामिला मन्त्रालयसे बन्ना नीति तथा कार्यक्रममे ओइनके स्वास्थ्य पुनस्र्थापना सेवाहे जोड डेना उहाँ प्रतिवद्धता व्यक्त करली ।
आन्तरिक मामिला तथा कानून मन्त्रालयके सेक्सन अफिसर दिपेन्द्रसिंह विष्ट प्रदेशमे नीति कानून बनाके अपाङता रहल व्यक्तिहुकनके माग मुद्दाहे सम्बोधन कैना आवश्यक रहल बटैलै । उहाँ महासंघसे उठान हुइल माग मुद्दा जायज रहल ओरसे हाली नीति बनाके आघे बह्रना जरुरी रहल बटैलै ।
नीति तथा योजना आयोगके सचिव पदमराज जोशी १६औं योजनाके ड्राफट तयार हुइटी रहल ओरसे अपाङता रहल व्यक्तिहुकनके माग समेटना प्रतिबद्धता जनैले बटै । १५औं योजनामे रहल मजा बाटहे समावेश करटी छुटल चिजहे परिमार्जन करटी मागहे समेटना प्रतिवद्धता जनैले बटै ।
सेती प्रादेशिक अस्पतालके भौतिक चिकित्सक डा. युवराज पाण्डेय, स्वास्थ्य कार्यालय कैलालीके प्रमुख अशुतोष श्रेष्ठलगायतसे अपाङता रहल व्यक्तिहुकनहे स्वास्थ्य पुनस्र्थापना सेवा डेना प्रतिवद्धता जनैले बटै ।
राष्ट्रिय अपाङता महासंघ सुदूरपश्चिम प्रदेशके अध्यक्ष मानबहादुर साउदके अध्यक्षतामे हुइल कार्यक्रममे डा. विरेन्द्रराज पोख्रेल अपाङता रहल व्यक्तिलगायत सक्कुहुनके लाग स्वास्थ्य सम्बन्धी पुनस्र्थापनाके सवाल तथा समग्र अपाङता व्यवस्थापनके लाग सुदूरपश्चिम प्रदेश सरकारके प्राथमिकता, प्रदेश सरकारके आगामी कदमबारे सहजीकरण करल रहिट । ओस्टेक करके राष्ट्रिय अपाङता महासंघ केन्द्रीय कार्यालयके ओरसे सन्दिप विक अपाङता सवाल ओ अधिकारबारे सहजीकरण करल रहिट । कार्यक्रम संचालन महासंघके महासचिव नन्दराज भट्ट करल रहिट ।
२०७८ के जनगणना अनुसार सुदूरपश्चिम प्रदेशमे ७० हजार ८ जाने अपांगता रहल व्यक्ति रहल बटै । जेम्ने कैलालीमे २२ हजार ३६३ जाने अपांगता रहल व्यक्ति रहल महासंघके अध्यक्ष साउद जनैलै ।
