‘रुपान्तरण अभियानसे जनतामे लावा आशा जगैले बा’
पहुरा समाचारदाता
धनगढी, २२ अगहन । प्रधानमन्त्री एवम् नेकपा (माओवादी केन्द्र) के अध्यक्ष पुष्पकमल दाहाल ‘प्रचण्ड’ पार्टीके विशेष रुपान्तरण अभियानसे जनतामे लावा, आशा जगैना सफल हुइल बटैले बाटै ।
कैलालीके धनगढी उपमहानगरपालिका–१६ स्थित घसिटा गाउँमे शुकके आयोजित नेकपा (माओवादी) केन्द्रके विशेष रुपान्तरण कार्यक्रमहे सम्बोधन कैटी उहाँ ओइसीन बटाइल हुइट ।
माओवादी पार्टी जनताके अपेक्षाअनुसार काम करे नैसेकल गुनासो बह्रलपाछे अपने केन्द्रीय समितिमे प्रस्ताव राखके रुपान्तरण अभियान सञ्चालनके लाग सर्वसम्मत निर्णय कराइल प्रधानमन्त्रीके कहाइ रहल बा ।
उहाँ इ अभियानमे पुरुबके नेताहे पश्छिउ, पश्छिउकहे पुरुब, हिमालकेहे तराई–मधेस ओ तरार्ई–मधेसके नेताहे हिमाल पहाडके वडामे खटाके अभियान जारी राखल बटैलै । “इ अभियान आब अन्तिम चरणमे पुगल बा । अभियान ओराइलपाछे विधान सम्मेलन कैके फेनसे औरे कार्यक्रम कैना कहले बाटी ।”
अभियानसे जनयुद्धके घाइते, सहिद परिवार, बेपत्ताके परिवारसँग माओवादीहे जोर्नाक्े साथे जनतामे फेन लावा उत्साह थपल प्रधानमन्त्री प्रचण्ड बटैलै । उहाँ अभियान ओराइलपाछे अन्तिम सम्मेलन कैना ओ देशभरके प्रतिवेदन लेके फेनसे औरे अभियान आघे बह्रैना चर्चा करल रहिट । “इ अभियानसे पार्टीके शक्तिहे अझ वृद्धि कैनामे सफलता प्राप्त कैना बा” उहाँ कहलै ।
ओस्टके, नेपालके प्रतिष्ठा बह्रैना ओ अन्तर्राष्ट्रिय सहयोग जुटाइक लाग अपने छिमेकी राष्ट्र भारत ओ चीनके भ्रमणपाछे अमेरिकाके भ्रमण करल बटाइल रहिट । रुपान्तरण अभियान अन्तर्गत नेकपा (माओवादी केन्द्र) के अध्यक्ष एवम् मुलुकके प्रधानमन्त्रीके हैसियतसे अपने सातु प्रदेशके एक–एक वडामे पुगके जनताके बात सुन्नानिर्णयअनुसार सुदूरपश्चिम प्रदेशमे धनगढी उपमहानगरपालिकाके वडा १६ मे पुगल प्रचण्डके कहाइ रहे ।
उहाँ इ आपन छैटौं वडा रहल उल्लेख कैटी बाँकी रहल कोशी प्रदेशके कौनो एक वडामे फेन अपने पुग्ना बटैलै ।
ओस्टके, फाप्ला क्रिकेट मैदानहे राष्ट्रिय गौरवके आयोजना बनाइ पर्र्ना, बेहडाबाबा मन्दिरहे धार्मिक पर्यटकीय क्षेत्रके रुपमे विकास करे पर्ना, जाखोर तालमे पिकनिक स्थल बनाइ पर्ना मागप्रति अपने सकारात्मक रहल उहाँ बटैलै ।
ओस्टके, धनगढी उपमहानगरपालिका–१५से बनकटीसम १५ किलोमिटर कालोपत्रे कृषि सडक निर्माण, धुरजन्ना–डुमलिया जोर्ना शिवगंगा लडियामे मोटरेबल पुल निर्माण, कैलारी–९ सिमराना, कोइलही, गदरिया जोर्ना घुरहा लडियामे पुल निर्माणके मागप्रति फेन आपन गम्भीर ध्यानाकर्षण हुइल बटैलै । “अपनेनके माग पूरा कैना अधिकतम पहल कैना विश्वास डेहुवाइना चाहटुँ” उहाँ कहलै ।
