प्रधानमन्त्री दाहालहे १० किलोके माला
पहुरा समाचारदाता
धनगढी, २२ अगहन । प्रधानमन्त्री पुष्पकमल दाहालहे १० किलोके माला लगाइल बा । सुदूरपश्चिम महोत्सवके उद्घाटन करे पुगल प्रधानमन्त्री दाहालहे कैलाली उद्योग वाणिज्य संघके अध्यक्ष पुष्पराज कुँवर १० बुँदे मागसहित १० किलोके माला लगाइल हुइट ।
संघसे गौरिफण्टा नाकाके स्तरोन्नित करे पर्ना, दशरथ चन्द स्वास्थ्य विज्ञान प्रतिष्ठान, खप्तड, शुक्लाफाँटा, घोडाघाडी जैसिन पर्यटकीय क्षेत्रके प्रबद्र्धन, औद्योगिक क्षेत्र ओ विशेष औद्योगिक प्याकेज, जडीबुटी प्रसोधन केन्द्र, शित गृह, चिनी मिल, सेती हाइड्रो पावर, गेटा विमानस्थलहे वैकल्पिक अन्तर्राष्ट्रिय मार्ग, सक्कु जिल्लामे पक्की सडक, सूचना प्रविधि, बहृमदेव सडक, चिसापानीसे गड्डाचौकीसमके स्थानीय राजमार्गके बजारके जग्गा दर्ता, प्रदर्शनी स्थल, नेपाल टेलिभिजनके प्रशारण केन्द्र ओ सुदूरपश्चिम साँस्कृतिक संग्राहलय लगायतके १० बुँदे माग आघे सरले बा ।
संघसे २०६३ सालसे धनगढीमे सुदूरपश्चिम महोत्सव आयोजना कैटी आइल बा । शुकके महोत्सवके १७ औं संस्करणके अवसरमे प्रधानमन्त्री दाहालहे १० बुँदे मागपत्र बुझाइल हो । उहे अवसरमे अध्यक्ष कुँवर अब्बेसम सरकारसे निजी क्षेत्रसे आघे सारल १० ठो मागबारे कौनो प्रक्रिया आघे बह्राइ नैसेकल बटाइल रहिट ।
धनगढीमे २०६३ सालसे हुइटी आइल सुदूरपश्चिम महोत्सवके उद्घाटनके लाग राष्ट्रपति, प्रधानमन्त्रीसे पूर्व संघीय सांसद तथा प्रदेशके तत्कालिन मुख्यमन्त्री त्रिलोचन भट्ट बर्का पहुनाके रुपमे सहभागि होसेकल बाटै । संघसे हरेक बरस पुराने मागहे आघे बह्रैटी महोत्सवके आयोजना कैटी आइल बा । कैलाली उद्योग वाणिज्य संघके अनुसार महोत्सवके १७औं संस्करणसम आइटसम पाँचठो माग किल सम्बोधन हुइल जनाइल बा ।
सेती प्रादेशिक अस्पतालमे आइसियू स्थापना, क्षेत्रीय खेलकुद रंगशाला, विश्व विद्यालय स्थापना, अप्टिकल फाइबर विस्तार ओ दुग्ध प्रशोधन केन्द्रके स्थापना कैके पाँच बुँदे माग सुनुवाई हुइल जनाइल बा । अन्तराष्ट्रिय क्रिकेट रंगशाल, प्रदेश सभा सम्मेलन गृह, दोधारा–चाँदनी सुक्खा बन्दरगाह, प्रदेशस्तरीय पर्यटन केन्द्र निर्माण, गेटा विमानस्थल धावन मार्ग कालोपत्र तथा अन्तर्राष्ट्रिय विमानस्थलके रुपमे विकास करे पर्ना ओ सेती प्रादेशिक अस्पतालहे सुविधासम्पन्न बनैना बुँदा आंशिक रुपमे सरकारसे सुनुवाई करल अध्यक्ष कुँवर बटैलै ।
