लागु औषध दुव्र्यशनी न्यूनिकरण कैना सडक नाटक प्रदर्शन
पहुरा समाचारदाता
कञ्चनपुर, २२ अगहन । अनौपचारिक क्षेत्र सेवा केन्द्र (इन्सेक)से बेलौरी नगरपालिका–२ गोकुलपुरस्थित लक्ष्मी माध्यमिक विद्यालय ओ बेलौरी नगरपालिका ३ खिरीयास्थित जनजागृती पुष्पलाल स्मृति माविमे गठित बाल अधिकार चेतना समूहके संयूक्त सडक नाटक टोलीसे लागु औषध दुव्र्यशनी न्यूनिकरणके लाग जनचेतनामुलक सडक नाटक प्रदर्शन कैगिल बा ।
समाजमे परटी रहल असर ओ न्यूनिकरणमे सरोकारवालाहुकनके भुमिका विषयमे सडक नाटक तयार पारके लक्ष्मी माविके ५९ औं वार्षिकोत्सव तथा अभिभावक दिवसके अवसरमे प्रदर्शन कैगिल हो ।
मानव अधिकार शिक्षा कार्यक्रम अन्तर्गत स्थानीय समुदायहे अधिकार ओ कर्तव्यप्रति सचेत परटी जिम्मेवार निकायहे जवाफदेही बनैना उद्देश्यसे बाल अधिकार चेतना समूहसे सडक नाटक प्रदर्शन करल हो । सडक नाटक प्रदर्शनमे शिक्षक, विद्यार्थी, अभिभावक, मानवअधिकार समुहके सदस्य लगायत सयौंके संख्यामे स्थानीयहुकनके उपस्थिति रहल रहे ।
सडक नाटक प्रदर्शन कार्यक्रममे बालबालिकाहुक्रे लागुऔषध दुव्र्यशनीसे समाजमे परटी रहल नकरात्मक असर ओ रोकथामके लाग सरोकारवालाहुकनके भुमिका झल्कैना प्रयास करल रहे ।
बेलौरी नगरपालिकाके नगर प्रमुख पोतीलाल चौधरी पछिल्का समयमे बेलौरी नगरपालिका लागुऔषध ओसार पसार तथा सेवन करुइयाके ट्रान्जिट प्वाईन्ट बन्टी गैल ओरसे यैसिन खाले नाटकमार्फत समाजमे सकरात्मक सन्देस प्रवाह करलक ओरसे बालअधिकार चेतना समुहहे धन्यवाद ज्ञापन करलै ।
१४ जाने पात्र रहल सडक नाटकमे बालबालिका, विद्यालय, शिक्षक, वडाअध्यक्ष, स्थानीय मदिरा व्यापारी, मदिरा सेवन करटी रहल संघरीया, प्रहरी लगायतके लागु औषध दुव्र्यशनी न्यूनिकरणमे हुई सेक्ना भुमिका झल्कन खालके कथा प्रस्तुत करल रहे ।
