अर्थतन्त्र सुधारओरः प्रधानमन्त्री प्रचण्ड
पहुरा समाचारदाता
धनगढी, २२ अगहन । प्रधानमन्त्री पुष्पकमल दाहाल प्रचण्ड अब्बे नेपालके अर्थतन्त्र सुधारओर आघे बह्रल बटैले बटै । उहाँ शुकके रोज बैठल वोर्डके बैठकसे मौद्रिक नीतिमे सुधार हुइल ओ यिहीसे नेपालके अर्थतन्त्रमे सुधार हुइना उल्लेख करलै ।
सुदूरपश्चिम प्रदेशके राजधानी धनगढीमे सुरु हुइल सुदूरपश्चिम महोत्सव २०८० के उदघाटन करटी प्रधानमन्त्री प्रचण्ड अर्थतन्त्र सुधार हुइटी गैल ओरसे नइडरैना व्यवसायीहे आश्वस्त पारे खोजल रहिट । प्रधानमन्त्री कहलै– यी परिवर्तन मन नइपरल हुक्रे नेगेटिभ बाट केल कैना करल बटै मने रेमिटेन्स बह्रल बा, राजस्व गैल महिनासे बह्रे लागल बा, अब्बे १६–१७ महिनाहे पुग्न मुद्रा संचित हुइल बा ।
उहाँ ठप्लै– मने जटरा सुधार हुई पर्ना हो ओटरा हुइल नइहो, सुधारके लाग सरकार लग्टी रहल बा । उहाँ अब्बे परिवर्तन बचैना ओ राष्ट्रियताके सवालमे सत्ता पक्ष ओ प्रतिपक्ष एक ठाउँमे आइल उल्लेख करटी राजनिति सुधारओर रहल बटैलै । एनसेल खरिद बिक्रिबारे बाहेर आइल बाटमे छानविन ओ अध्ययन हुइटी रहल प्रधानमन्त्रीके कहाई बा । उहाँ कहलै– मै प्रधानमन्त्री रहुन्जेल कौनोफे जनता ओ राष्ट्र विरोधी काम नइकैना प्रतिवद्दता व्यक्त करटु, एक थरी लरके नानल परिबर्तन उल्टाई खोज्टी बा ओम्ने सचेत रहन सक्कुहुनहे आग्रह करठु ।
ओस्टे प्रधानमन्त्री पुष्पकमल दहाल ‘प्रचण्ड’ सुदूरपश्चिमके विकास अपन प्राथमिकतामे रहल बटैले बटै । धनगढी पुगल उहाँ पहिल चो प्रधानमन्त्री हुइलठेनसे अपने सुदूरपश्चिमके लाग ढेर सोच्न करल बटाइल रहिट । अपन कार्यकालमे सुदूरपश्चिममे सहिद दशरथ चन्द स्वास्थ्य विज्ञान प्रतिष्ठानके कामफे सुरु करैलक बत्वाइटी आब हलहाली विश्वविद्यालयके विधेयक पारित कैके पह्राई सुरु करैना उहाँ बटैलै । प्रधानमन्त्री प्रचण्ड धनगढीस्थित फाप्ला क्रिकेट मैदानहे आगामी वर्ष राष्ट्रिय गौरवके आयोजनामे समेटनाफे बटैले बटै ।
यिहे विच महोत्सव उदघाटनके क्रममे प्रधानमन्त्रीहन १० बुँदे माग रख्टी १० किलोक मालाफे घलागिल बा ।
गौरीफन्टा (त्रिनगर भन्सार) नाकाहे सुविधा सम्पन्त अन्तर्राष्ट्रिय नाकाके रुपमे विकास करे पर्ना, प्रदर्शनी स्थलके निर्माण करे पर्ना, सुदूरपश्चिम प्रदेशमे उद्योग स्थापनार्थ प्रोत्साहन स्वरुप १० वर्षसम टयक्स फ्रि जोन धारणा करे पर्ना, विशेष औधोगिक क्षेत्रके स्थापना ओ विशेष आौद्योगिक प्याकेजके व्यवस्था करे पर्ना माग धारल बा ।
सुदूरपश्चिम प्रदेशहे चिनसंग जोरना नाका खुलाई पर्ना, पश्चिम सेती जलविद्युत आयोजना निर्माणके शिघ्र कार्यान्वयन ओ सुदूरपश्चिम प्रदेशहे लोडसेडिङ मुक्त करे पर्ना माग करल बा ।
कृषि विश्वविद्यालयके स्थापना करे पर्ना, प्रदेश सांस्कृतिक संग्रहालय निर्माण करे पर्ना, सूचना प्रविधी केन्द्रके स्थापना करे पर्ना, सेती अञ्चल अस्पतालहे सुविधा सम्पन्न क्षेत्रीय अस्पतालके रुपमे विकास करे पर्ना माग करल बा ।
पुस २ गतेसम संचालन हुइना महोत्सव उदघाटन कार्यक्रम कैलाली उद्योग वाणिज्य संघके अध्यक्ष पुष्पराज कुवँरके अध्यक्षतामे हुइल रहे । ओस्टेक करके शुकके सकारे धनगढीके सहिद गेटसे महोत्सवस्थलसम प्रभातफेरी ¥याली प्रदर्शन कैगिल बा । महोत्सवमे अनुमानित ३ करोडके लगानीमे उत्कृष्ट रुपमे सम्पन्न कैजैना बा कलेसे महोत्सवमे उद्योगी व्यवसायके १० करोड बरावरके कारोबार हुइना अनुमान कैगिल बा ।
महोत्सवमे कृषि, जडिबुटी, हस्तकला फर्निचर, अटोमोबाइल्स, गारमेन्ट, इलेक्टोनिकल, होटल ओ सुचना प्रविधि करके ४ सय स्टल रहल बा । महोत्सवमे करिब ६ लाख ५० हजार व्यक्ति अवलोकन कैना अनुमान कैगिल बा । महोत्सवहे भव्यरुपमे सम्पन्न कैना मुल समिति सहित ३० उप समिति रहल बा । महोत्सव अवलोकनके लाग विद्यार्थीनहे रु.५० टिकटदर धारल बा कलेसे सर्वसाधारणहे रु.१०० ओ फरक क्षमता रहलहे निशुल्क करल बा ।
