समिक्षा महिला विकास बहुउद्देश्यीय सहकारीके १७औं बार्षिक साधारण सभा

पहुरा समाचारदाता
हसुलिया, २६ अगहन । कैलाली जिल्लाके कैलारी गाउँपालिका वडा नम्बर ७ मे महिलाहुक्रे संचालन करल समिक्षा महिला विकास बहुउद्देश्यीय सहकारीके १७औं बार्षिक साधारण सभा मंगरके रोज सम्पन्न हुइल बा ।

सहकारीके अध्यक्ष उर्मिला चौधरीके अध्यक्षतामे हुइल कार्यक्रममे वडका पहुना कैलारी गाउँपालिका उपाध्यक्ष भगवतीकुमारी चौधरी रहल रहिट । उदघाटन कार्यक्रममे बोल्टी महिलाहुक्रे मिल्के संचालन करल समिक्षा महिला विकास बहुउद्देश्यीय सहकारीसे महिलाहुक्रनहे आत्मनिर्भर बनैना सब्बल हुइटी गैल बटैली । यी सहकारीसे महिलाके आयआर्जन कैना सफल हुइटी गैलफे बटैलै । समिक्षा महिला विकास बहुउद्देश्यीय सहकारीसे उत्पादन करल बेसार ओ लसुन गाउँपालिका खरिद कैना ओरसे दिदी बहिनीयाहुक्रनहे उत्पादनमे जोर डेना गाउँपालिका उपाध्यक्ष बटैली ।

कार्यक्रममे कैलारी गाउँपालिका महिला तथा वालबालिका शाखा प्रमुख बालकुमारी चौधरी महिलाहुक्रे संचालन करल सहकारीमे पारदर्शिता डेखल बटैली । उहाँ कहली, कैलारीमे टमान सहकारी रहल मने महिलाहुक्रे संचालन करल सहकारी आघे बह्रल बटैली ।

सहकारीके १७औं बार्षिक साधारण सभा कार्यक्रममे शेयर सदस्य औती चौधरी, खुशिया चौधरी, प्रदेशनी चौधरी, दुख्नी चौधरीहे सम्मान कैगिल बा ।

कार्यक्रममे विशिष्ट पहुना कार्यपालिका सदस्य सुन्दरीदेवी चौधरी, पहुना भल्मन्सा जियाराम चौधरी, कारितास नेपालके कार्यक्रम अधिकृत छेदुराम चौधरी, सहकारीके ओरसे शेयर सदस्य मुसम्पी देवी चौधरीलगागतसे शुभकामना मन्तव्य व्यक्त करल रहिट ।
कार्यक्रममे स्वागत मन्तव्य कृपा चौधरी, बार्षिक लेखा परिक्षण पार्वती चौधरी, सम्मन्न सामाजिक कार्य प्रस्तुत रमिला चौधरी, ऋण उपसमितिके ओरसे प्रतिवेदन पार्वती चौधरी, लेखा समितिके ओरसे प्रतिवेदन राधिका चौधरी, वार्षिक कार्ययोजना सुलोचना चौधरी प्रस्तुत करल रहिट ।