कैलारी–२ के सुत्केरी महिलनहे पोषण सामाग्री

पहुरा समाचारदाता
हसुलिया, २६ अगहन । कैलाली जिल्लाके कैलारी गाउँपालिका वडा नम्बर २ मे सुत्केरी हुइल महिलाहुकनके लाग उपाध्यक्षसंग पोषण विशेष कार्यक्रम अन्र्तगत पोषण सामाग्री वितरण कैगिल बा ।

गाउँपालिका अन्तर्गतके स्वास्थ्य संस्थामे सुत्केरी हुूइल महिलाहुकनके लाग उपाध्यक्षसंग पोषण विशेष कार्यक्रम अन्तर्गत मंगरके रोज वडा न २ के २३ जाने सुत्केरी महिलाहुकन कोसेली (पोषण सामाग्री तथा हाइजिन किट) वितरण कैगिल हो ।
गाउँपालिकाके उपाध्यक्ष भगवतीकुमारी चौधरीके वडका पहुना तथा सामाजिक विकास समितिके संयोजक तथा वडा नम्बर ३ के वडा अध्यक्ष सन्तराम चौधरीके विशिष्ट पहु्नामे माघ महिना एहोर सुत्केरी हुइल महिलाहुकनके लाग उपाध्यक्षसंग पोषण विशेष कार्यक्रम अन्र्तगत सुत्केरी महिलाहुकन कोसेली (पोषण सामाग्री तथा हाइजिन किट) वितरण कैगिल हो ।

कार्यक्रममे बोल्टी उहाँ कहली, अपने गैल बरसफे यी कार्यक्रम लागु करल ओ यी बरसफे निरन्तरता डेहल बटैली । महिला सुत्केरी हुइलपाछे ढेर चिजके समस्या आइठ । डाईसंग संगे बच्चाके स्वास्थ्य मजा होए कहिके यी कार्यक्रम लागु यी बरसफे करल हो ।ֹ

कार्यक्रमके विशिष्ट पहुना कैलारी गाउँपालिका वडा नम्बर ३ के अध्यक्ष सन्तराम चौधरी पालिकासे नानल सुत्केरी महिला हाइजिन किट, पोषण किट ओ बच्चा किट उपहार योजनासे डाई ओ लर्कनके स्वास्थ्यमे टेवा पुग्ना बटैलै । पोषणयुक्त खाना नइपाके ढेर जैसिन बच्चा कुपोषण हुइटी रहल ओरसे यी कोसेलीसे उही पुर्ति कैनाफे सहयोग मिल्ना उहाँ बटैलै ।

कैलारी गाउँपालिकाके स्वास्थ्य शाखा प्रमुख नरेशकुमार चौधरी सुत्केरी हुइल महिलाहुकनके लाग उपाध्यक्षसंग पोषण विशेष कार्यक्रम सक्कु वडामे लागु हुइना बटैलै । माघ महिनासे अब्बेसम जन्मल सक्कु सक्कु लरकोरिया डाईहे उ समान डेटी रहल स्वास्थ्य शाखा प्रमुख बटैलै ।

उपाध्यक्षसंग पोषण विशेष कार्यक्रम अन्र्तगतके कोसेली झोलामे सुत्केरी डाईक लाग हाइजिन किटमे (व्याग, ब्रस टुथपेष्ट, नोह कटनी, साबुन, सेनेटरी प्याड), बच्चा किटमे बेबी सोप, बेबी स्याम्पु, क्रिम, तेल) ओ पोषण सामाग्रीमे पाँच सय ग्राम घिउ, अण्डा ३० पिस, काजु १०० ग्राम ओ बदाम १०० ग्राम रहल बा ।

कार्यक्रममे वडा नम्बर २ स्थित स्वास्थ्य केन्द्रके जनस्वास्थ्य निरिक्षक विनोद भट्ट, गाउँपालिका उपाध्यक्ष्यके स्वकीय सचिव रामकृष्णा चौधरीलगायतके सहभागिता रहल रहे ।