कैलारी–८ मे स्तनपान कक्ष संचालन
पहुरा समाचारदाता
हसुलिया, २६ अगहन । कैलाली जिल्लाके कैलारी गाउँपालिका वडा नम्बर ८ मे स्तनपान कक्षके संचालनमे आइल बा ।
कार्यक्रमके वडका पहुना तथा गाउँपालिका उपाध्यक्ष भगवतीकुमारी चौधरी ओ सामाजिक विकास समिति संयोजक तथा वडा नम्बर ३ के वडा अध्यक्ष सन्तराम चौधरी एक कार्यक्रमके विच रिवन काटके प्रारम्भिक वाल सिकाई ओ स्तनपान कक्षके उदघाटन करल रहिट ।
स्तनपान कक्षके उदघाटन कार्यक्रममे बोल्टी गाउँपालिका उपाध्यक्ष भगवतीकुमारी चौधरीस्वास्थ्य चौकीमे सेवा लेहे अउइयाहे सहजुल हुइना बटैली । उहाँ कहली, ‘छोट लर्का अपन डाईसंग गैल बेला दुध खवैना ठाउँ नइरहठ । स्तनपान कक्ष नइहुके दुध खवैना कर्रा रहठ । यी वडामे स्थापना हुइलपाछे आब सहजुल हुई ।’
स्तनपान कक्षमे दुधे बालबालिकाहे दुध खवैना संगे छोट लर्कन खेल्ना मजा हुइलफे उहाँ बटैलै । यिहीसे आघे कैलारी गाउँपालिका वडा नम्बर २, ४ ओ ५ मेफे स्तनपान कक्ष स्थापना हुसेकल उपाध्यक्ष बटैली ।
कैलारी गाउँपालिका स्वास्थ्य शाखा प्रमुख नरेशकुमार चौधरी स्तनपान कक्ष गाउँपालिकाके पोषण विशेष कार्यक्रम अन्र्तगतके बजेटसे स्थापना हुइल बटैलै । स्तनपान कक्षमे १० हजार बराबरके खेल सामाग्रीफे हस्तान्तरण करल बटैलै । स्तानपान कक्ष खेल्टी, सिक्टी कैना उदेश्यसे स्थापना हुइल उहाँ बटैलै ।
कार्यक्रममे वडा सदस्य, सेतो गुराँस राष्ट्रिय बाल विकास कैलारी गाउँपालिकाके सहजकर्ता सुरज परियार लगायतके सहभागिता रहल रहे ।
