सहकारीहे पारदर्शी बनैना मन्त्री देउवाके सुझाव
पहुरा समाचारदाता
धनगढी, २७ अगहन । सुदूरपश्चिम प्रदेशके भौतिक पूर्वाधार विकासमन्त्री प्रकाशबहादुर देउवा सहकारी संस्थाहे पारदर्शी बन्न सुझाव डेले बटै । उहाँ सुदूरपश्चिम प्रदेशहे चिन्हैना नवजीवन सहकारी संस्थासे महत्वपूर्ण भूमिका खेलल बटैले बटै ।
नवजीवन सहकारी जैसिन ढेर संस्था हुइलेसे सरकार समेत बल्गर हुइना उहाँ बटैलै । नवजीवन सहकारी संस्थाके धनगढीमे आयोजित ३० औँ वार्षिक साधारण सभामे प्रमुख अतिथिके रूपमे बोल्टी मन्त्री देउवा कुछ सहकारी सेयर सदस्यके पैसा दुरुपयोग करल कारण सहकारी प्रति जनताके हेर्ना दृष्टिकोण परिवर्तन हुइल बटैलै ।
अब्बेक समय सहकारीसे कोई अलग रहे नइसेकी, सक्कु सहकारीमे जोरल बटै । आब आर्थिक अवस्था कमजोर रहलहे कार्यक्रम नानके वरोजगार बनैना ओर लग्ना सुझाव डेलै ।
ओस्टेक करके कार्यक्रममे प्रदेशसभा सदस्य धर्मराज पाठक सहकारी कहल राज्यके पिल्लर रहल हो, यकर दायरा सरकारसे बढाई पर्ना बटैलै । यी क्षेत्रमे डेखल समस्याहे सरकारसे समाधान करे पर्ना उहाँक कहाई बा ।
संस्थाके अध्यक्ष देवबहादुर वम नवजीवन सहकारीके ब्राण्डमे हाली बजारमे चाउर अइना ओ ओकर लाग ४ हजार ८ सय क्विन्टल धान खरिद करसेकल बटैलै । माघ महिनामे नवजीवनके दुई ठो डडेलधुरा ओ काठमाडौँमे शाखा खोल्न अनुमति पासेकल बटैलै ।
२०५० सालमे स्थापना हुइल सहकारी संस्थामे हाल ३२ हजार ७ सय ५४ जाने शेयर सदस्य बटै । संस्थासे सेयर सदस्य सुत्केरी हुईबेर १० हजार, मृत्यु संस्कारमे २० हजार ओ कौनो भारी अङ प्रत्यारोपण करे परलेसे एक लाख सहयोग करटी आइल बा । आर्थिक वर्ष २०७९÷८० के प्रतिवेदनमे २०८० असार मसान्तसम जगेडा तथा कोषमे ५५ करोड ५४ लाख रुप्या पुगल जनाइल बा । २०७९ असारसम उ कोषमे ५० करोड ८८ लाख रकम रहे । आर्थिक मन्दीके बाबजुदफे संस्थाके बचत संकलनमे असर परल नइविल्गाइठ ।
गैल वर्षके निक्षेप चार अर्ब नौ करोड १३ लाख ३० हजार रहलमे वृद्धि हुके २०८० असार मसान्तसम चार अर्ब ४१ करोड ४५ लाख ४१ हजार निक्षेप संकलन कैना सफल हुइल प्रतिवेदनमे उल्लेख बा । २०८० असार मसान्तसम संस्थाके नगद ओ बैंक मौज्दात एक अर्ब १९ करोड ३५ लाख ४३ हजार रहल बा । कार्यक्रममे पूर्व सांसद एवम् नवजीवनके सल्लाहकार महेश्वर पाठक, धनगढी उपमहानगरके उपमेयर कन्दलाकुमारी राना, पुनर्वास नगरपालिकाके मेयरलगायतसे शुभकामना मन्तव्य व्यक्त करल रहिट ।
