मेलमिलापकर्तनहे क्षेत्राधिकार भिटरके विवाद मिलैना आग्रह
पहुरा समाचारदाता
हसुलिया, २८ अगहन । स्थानीय तहके वडा–वडामे रहल मेलमिलापकर्ताहुकनहे क्षेत्रधिकार भिटर पर्ना विवाद केल मिलैना कैलारी गाउँपालिकाके उपाध्यक्ष भगवतीकु्मारी चौधरी बटैले बटी ।
कैलारी गाउँपालिका न्यायिक समितिके आयोजनामे विफेक रोज हसुलियामे मेलमिलापकर्ताहुकनके लाग हुइटी रहल दुई दिने पुनतर्जगी तालिमके उदघाटन कार्यक्रममे बोल्टी न्यायिक समितिके संयोजफे रहल उहाँ उ बाट बत्वाइल रहिट ।
उहाँ कहली, ‘गाउँपालिकाके प्रत्येक वडामे मेलमिलाप केन्द्र स्थापना हुइल बा । सुचिकृत हुइल मेलमिलापकर्ताहुकनहे विवाद मिलैना जिम्मा डेहल बा । अपनेहुक्रे छोट–छोट विवाद केल मिलैबी । क्षेत्राधिकारमे नजैबी ।’
गाउँघरमे पहिले पहिले सक्कु मेरिक विवाद मिलाजाए, मने कानून सम्मत विवाद मिलैना चाही । फौजदारी मुद्दा अदालतसे केल मिलाई मिलठ, उपाध्यक्ष कहली । न्यायिक समितिमे लेनडेन ओ साँधसिमाना विवाद ढेर आइल उहाँ बटैली । गाउँघरमे हिंसा, घरेलु हिंसा लुकैना प्रवृति रहल ओरसे अन्याय सहे नइहुइना उहाँ बटैली ।
कार्यक्रममे न्यायिक समिति सदस्य तथा वडा नम्बर १ के वडा अध्यक्ष धोजहरिपाल बोहरा मेलमिलापकर्तनहे न्यायिक समितिके सहयोगी रहल ओरसे टोकल विवादमे छलफल करैना आग्रह करलै ।
कैलारी गाउँपालिकाके प्रमुख प्रशासकीय अधिकृत विरबहादुर ऐर मेलमिलापर्ताहे कौनो मुद्दा हो कलेसे अदालतहे पठैना ओ गाउँघरमे रहल छोट छोट विवादमे छलफल करैना बटैलै ।
तालिमके सहजकर्ता पुष्पविक्रम शाही विवाद, मुद्दा मिलैना संग्गे मन मिलैना आवश्यक रहल बटैलै । उहाँ कहलै, डाक्टर कौनो घाउके अप्रेशन करके ठिक पारे सेक्ठ मने मन मिलैना कर्रा रहठ ।’ बादविवाद ओ मुद्दामे मन मिलाई सेक्लेसे ओकर समाधन हाली हुईसेकठ । विवादमे छलफल ओ कागजी सम्झौतासे भारी मन मिलैना हो । ओस्टेक उहाँ दुई दिनमे सहजीकरण करटी रहल बटै । ओस्टेक करके प्रमुख प्रशासकीय अधिकृत विरबहादुर ऐरफे सहजीकरण करटी रहल बटै ।
गाउँपालिका उपाध्यक्ष तथा न्यायिक समिति संयोजक भगवतीकुमारी चौधरीके अध्यक्षतामे हुइल उदघाटन कार्यक्रममे स्वागत मन्तव्य न्यायिक समिति सदस्य हरिद्वारी चौधरी ओ संचालन सामाजिक विकास अधिकृत यगम कलेल करल रहिट ।
उदघाटन कार्यक्रममे वडा नम्बर ३ के वडा अध्यक्ष सन्तराम चौधरी, वडा नम्बर ४ के वडा अध्यक्ष ठागुराम चौधरी, वडा अध्यक्ष ६ के वडा अध्यक्ष प्रेमबहादुर चौधरी, शिक्षा शाखा प्रमुख गणेशबहादुर सिंहलगायत कार्यपालिका सदस्य, तमान शाखाके कर्मचारी, नौ वडामे गठन हुइल मेलमिलाप केन्द्रमे आवद्ध रहल मेलमिलापकर्ताहुकनके सहभागिता रहल बा ।
