कैलालीके दुई शक्तिपिठमे लवाङगी पुजा सुरु

पहुरा समाचारदाता
धनगढी, २९ अगहन । थारु समुदायके पहिचानसे जोरल कैलालीके दुई शक्तिपिठमे शुकके रोजसे लवाङगी पुजा तथा वृहत सांस्कृतिक कार्यक्रम सुरु हुइल बा ।

कैलालीके घोडाघोडी नगरपालिकामे पर्ना घोरीघोरा मन्दिर ओ जोशीपुर गाउँपालिका वडा नम्बर ४ लालपुर बाँणी गाउँमे रहल कुटनी बुढिया मन्दिरमे शुकके रोजसे लवाङगी पुजा तथा सांस्कृतिक कार्यक्रम सुरु हुइल हो । घोरीघोरामे सुरु हुइल लवाङगी पुजा तथा सांस्कृतिक कार्यक्रमके उदघाटन सुदूरपश्चिम प्रदेश सरकारके मुख्यमन्त्री कमलबहादुर शाह करल रहिट, कलेसे जोशीपुर गाउँपालिका वडा नम्बर ४ लालपुर बाँणी गाउँमे रहल कुटनी बुढिया मन्दिरमे सुरु हुइलक लवाङगी पुजा तथा सांस्कृतिक कार्यक्रमके उदघाटन नेपाल सरकारका भूमि व्यवस्था सहकारी तथा गरिबी निवारण माननीय मन्त्री रन्जिता श्रेष्ठ चौधरी करल रही । कार्यक्रममे विशिष्ट पहुना सुदूरपश्चिम प्रदेश सरकारके भूमि व्यवस्था कृषि सहकारी माननीय मन्त्री रामेश्वर चौधरी रहल रहिट ।

कैलालीके घोडाघोडी नगरपालिका–१ घोडाघोडी मन्दिर परिसरमे घोरीघोरा लवाङगी पूजा तथा थारु सांस्कृतिक महोत्सव २०८० घोडाघोडी तथा संस्कृति संरक्षण समाजके आयोजनामे ‘थारु भाषा, कला, धर्म, संस्कृतिके करी सम्मान, घोरीघोरा धार्मिक पर्यटकीय क्षेत्रहे चिन्हैना हमार अभियान’ कना मूल नाराके साथ घोडाघोडी मन्दिर परिसरमे महोत्सव सुरु हुइल बा ।
यिहे अगहन २९ गतेसे पुस १ गतेसम सञ्चालन हुइना महोत्सवमे तलुवाके पर्यटकीय क्षेत्रमे उन्नति, थारु परम्परा, कला, संस्कृति प्रवद्र्धन, सांस्कृतिक जगेर्ना ओ धार्मिक क्षेत्रमे टेवा पुग्न उद्देश्यके साथ महोत्सव सुरु हुइल हो ।

कार्यक्रममे लवाङगी पूजा तथा घोरीघोरा महोत्सवमे विशेष करके थारु समुदायके पुरान गुरुवासे नाँच्ना वडका नाच, महिलासे सामूहिक नाँच्ना सखिया नाँच, लाठी नाँच, झुम्रा नाँच, दिन नचुवा नाँच, धमार, मांगरके साथे थारु समुदायके स्थानीय प्रतिभाके संरक्षण संवद्र्धनके साथे राष्ट्रिय तथा अन्तर्राष्ट्रियस्तरमे अपन समुदायके पहिचानहे चिन्हाइक लाग टमान प्रस्तुति प्रस्तुत करल बा ।

घोडाघोडी तथा संस्कृति संरक्षण समाजके अध्यक्ष चन्द्र चौधरीके अध्यक्षतामे हुइल महोत्सव उदघाटन कार्यक्रममे प्रदेशसभा सभा सदस्य खुशीराम चौधरी, नगर प्रमुख खडकबहादुर रावट, नगर उपप्रमुख गुलिया चौधरी, पूर्व कृषि मन्त्री गौरीशंकर चौधरी, नेपाली काँग्रेसके जिल्ला उपसभापति भीम बडुवाल, पूर्व नगर उपप्रमुख प्रेमकुमारी थापालगायत तमान राजनितिक दलके प्रतिनिधिहुत्रे शुभकामना मन्तव्य व्यक्त करल रहिट ।

कार्यक्रममे घोडाघोडी नगरपालिका, बर्दगोरिया गाउँपालिकाके ८२ गाउँके भलभन्सा तथा स्थानीयहुकनके सहभागिता रहल बा । ोडाघोडी नगरपालिका नगर स्तरीय भलमन्सा कार्यसमितिके अध्यक्ष बुधराम चौधरी कार्यक्रममे स्वागत मन्तव्य ओ सञ्चालन दयाराम चौधरी करले बटै ।

ओस्टेक करके जोशीपुरके कुटनी बुढिया मन्दिरमे हुइटी रहल लवाङगी पुजा तथा थारु सांस्कृतिक महोत्सवके उदघाटन नेपाल सरकारके भूमि व्यवस्था सहकारी तथा गरिबी निवारण माननीय मन्त्री रन्जिता श्रेष्ठ चौधरी करल रही । कार्यक्रममे विशिष्ट पहुना सुदूरपश्चिम प्रदेश सरकारके भूमि व्यवस्था कृषि सहकारी माननीय मन्त्री रामेश्वर चौधरी, माननीय राज्यमन्त्री कैलाश चौधरी, गाउँपालिका अध्यक्ष चित्र चौधरी रहिट ।

“कला संस्कार संस्कृति हमार पहिचान, यिहीहै बचैना गुरुबा बैडावा सोरहिनिया ओ भल्मन्सा समाजके अभियान’ कना मूल उद्देश्यसहित लवाङगी पूजासहिट थारु सांस्कृतिक महोत्सव कार्यक्रम, जोशीपुरमे हुइटी रहल बा ।
थारु समुदायक पहिचानसे जोरल कुटनी बुढिया मन्दिरमे गुरुवा बैडवा सोरिहिनिया समाज ओ जोशीपुर भलमन्सा समाज जोशीपुरके संयुक्त आयोजनामे लवाङगी पुजा ओ सांस्कृतिक कार्यक्रम हुइटी रहल कार्यक्रमके व्यवस्थापक रामबहादुर चौधरी बटैलै । मलवारा क्षेत्रके सबसे भारी शक्तिपिठ (कुटनी बुढिया मन्दिर) मे विगतके वर्ष जस्टे यी वर्षफे लवाङगी पुजा तथा वृहत सांस्कृति कार्यक्रम सुरु हुइल उहाँ बटैलै ।
परापूर्वक कालसे चल्टी आइल लवाङगी पुजा अपन कुल देउतनके नाममे कैना पुजा हुइलक ओरसे यकर गरिमा ओ महत्व जोगाइक लाग हरेक वर्ष लवाङगी पुजा अनिवार्य करपर्ना थारु गुरुवा शंकर कठरिया बटैले बटै ।

थारु समाजमे एक वर्षभिटर हरेक चार महिनापाछके एक सामुहिक पुजा कैजाइठ,’ गुरुवा शंकर कहलै, गर्मी सिजनम धुरिया पुजा, वर्षा सिजनम हरेरी ओ हिउँद अर्थात जार सिजनमे लवाङगी पुजा थारु समुदायसे कैठै ।’

लवाङगी पुजा हरेक वर्षके अगहन महिनाके शुक्लापक्षके पंचमी तिथिके दिन कैना गुरुवा कठरिया बटैलै । लवाङगी पुजामे चर्तुथदर्शीके साँझ कुल देउथानहे थारु चलन अन्तरगत ढकहेर गुरुवासे रातभर ढाक बजैटी गुरुवाहुँक्रे रातभर देउता खेल्न सुसुवइना कैठ ओ बिहान हुइना समयमे सामुहिक पुजा कैटी कुलदेउटाहे बली चढैना करटी आइल उहाँ जनैलै ।

अगहन २९ गतेसे सुरु हुइल कार्यक्रममे काल्ह दुसरा दिन थारु संस्कृतिक संरक्षण एवं प्रवद्र्धन कैना संस्कार संस्कृति भेषभुषा सहितके वृहत सांस्कृतिक कार्यक्रम हुइना ओ पुस १ गते बिहान विधिवत रुपमे कुल गुरुवासे देवीथानमे बलीसहितके लवाङगी पुजा कैके समापन कैना व्यवस्थापक रामबहादुर बटैलै ।

यी वर्षके लवाङगी पुजामे मुङग्हवा नाँच, सखिया, नाँच, झुम्रा नाँच, हुरदुङवा नाँच, दिन नचुवा नाँच, लाठी नाँच, कठघोरी नाँच, कठरिया होरी नाँचक साथे राष्ट्रिय तथा कलाकारहुँक्रनकफे प्रस्तुती रहल उहाँ जनैलै ।