मेलमिलापकर्ताहुकनहे दुई दिने पुनर्तजगी तालिम
पहुरा समाचारदाता
हसुलिया, २९ अगहन । कैलारी गाउँपालिकाके नौ वडामे स्थापना हुइल मेलमिलाप केन्द्रमे आवद्ध रहल मेलमिलापकर्ताहुकनहे दुई दिने पुनर्तजगी तालिम डेगिल बा ।
कैलारी गाउँपालिका न्यायिक समितिके आयोजनामे विफेक रोजसे हसुलियामे मेलमिलापकर्ताहुकनहे पुनतर्जगी तालिम डेगिल हो । तालिम समापन कार्यक्रमके अध्यक्ष तथा न्यायिक समिति संयोजक भगवतीकुमारी चौधरी क्षेत्राधिकारमे पर्ना विवाद मिलैना ओ कुछ गाह्रोसारो अइलेसे तालिममे सिखल सीपके प्रयोग कैना बटैली । उहाँ मेलमिलाप केन्द्रमे आइल विवादहे न्यायिक समतिमे अनिवार्य रुपमे दर्ता करे पर्ना बटैली । मेलमिलाप केन्द्रमे एक ठो विवाद मिलाइल बाफत प्रत्येक जनहनहे पाँच सय रुप्याके दरसे सेवा सुविधा डेटी रहल बटैली । उहाँ कैलारीमे रहल मेलमिलापकर्तनके पहिचानके परिचयपत्रके व्यवस्था हुइटी रहल, कार्यालय संचालनके लाग कुर्सी ओ टेबुलके व्यवस्थाफे करल बटैली ।
समापन कार्यक्रममे वडा नम्बर ८ से सहभागि हुइल मेलमिलापकर्ता अनिता चौधरी दुई दिने तालिममे सैद्धान्तिक ओ व्यावहरिक बाट सिख्ना मौका पाइल बटैली । मेलमिलापकर्ताहुकनहे धैर्यहुके काम कैना जरुरी रहलफे उहाँ बटैली ।
दुई दिने तालिममे सहजीकरण अधिवक्ता पुष्पविक्रम शाही ओ कैलारी गाउँपालिकाके प्रमुख प्रशासकीय अधिकृत विरबहादुर ऐर करल रहिट । तालिममे नौ वडामे गठन हुइल मेलमिलाप केन्द्रमे आवद्ध रहल मेलमिलापकर्ताहुकनके सहभागिता रहल रहे ।
