लेहेंगा सिल्ना तालिमके गाउँपालिका उपाध्यक्षसे अनुगमन

पहुरा समाचारदाता
हसुलिया, २९ अगहन । कैलाली जिल्लाके कैलारी गाउँपालिका वडा नम्बर २ संचालन हुइटी रहल लेहेंगा सिल्ना तालिमके गाउँपालिका उपाध्यक्ष भगवतीकुमारी चौधरी अनुगमन करले बटी ।

व्यवसायिक तथा सीप विकास तालिम केन्द्र धनगढी कैलाली ओ कैलारी गाउँपालिका २ नं.वडा कार्यालय उजलीसेमर कैलालीके सहकार्यमे निःशुल्क रुपमे सञ्चालित ४५ दिने (२२५ कार्यघण्टा) लेहेंगा शिल्ना तालिम यिहे महिनाके अगहन ५ गतेसे सुरु हुइल बा । उ तालिमके अनुगमन करटी गाउँपालिका उपाध्यक्ष भगवतीकुमारी चौधरी थारु लेंहेगाके माग बह्रल ओरसे मजासे सिखके व्यावसायीकरण कैना आग्रह करली ।

उहाँ कहली, ‘गाउँपालिकाभिटरके सरकारी कार्यालय ओ विद्यालय क्षेत्रमे हप्ताके एक दिन सांस्कृतिक पोशाक अनिवार्य कैना छलफल आघे बह्राव उ लागु हुई कलेसे परम्परागत पोशाकके आउर ढेर माग बह्री ।’

अनुगमनमे वडा नम्बर २ के वडा अध्यक्ष विकास चौधरी, वडा सचिव हिरा ठकुल्लालगायत कर्मचारीहुकनके सहभागिता रहे । निशुल्क लेंहगा सिल्ना तालिममे २० जाने थारु समुदायके महिलाहुकनके सहभागिता रहल बा । कलेसे प्रशिक्षण ओमकुमारी चौधरी डेटी रहल बटी । प्रशिक्षक चौधरी एक ठो कटौटीदार लेंहेगा शिल्ना करिब १५ से २० दिन लग्ना बटैली ।