बासुलिङ सुगर मिलके अनुगमन
पहुरा समाचारदाता
सुखड, ३० अगहन । नम्मा समयसे बन्द हुके खण्डहर बनल सुदूरपश्चिमके सबसे भारी उद्योग बासुलिङ सुगर मिलके शनिच्चर चिनी उद्योग तथा उखु किसानके समस्या समाधान ओ सुझाव उपसमितिसे स्थलगत अनुगमन करले बा ।
प्रतिनिधिसभा अन्तर्गतके उद्योग तथा वाणिज्य ओ श्रम तथा उपभोक्ता हित समितिके चिनी उद्योग तथा उखु किसानके समस्या समाधान ओ सुझाव उपसमितिसे अनुगमन करल हो । उपसमितिके संयोजक कृष्णकुमार श्रेष्ठ (किसान) रहल पाँच सदस्यीय उपसमितिसे स्थलगत अनुगमन करल हो । अनुगमनके क्रममे उपसमितिके संयोजक कृष्णकुमार श्रेष्ठ (किसान) दुई दशकसे बन्द रहल यी चिनी मिल पुनर्निर्माण करे सेक्ना बटैलै । यी चिनी मिल सञ्चालन हुइलेसे यी क्षेत्रके सयौँ किसान लाभान्वित हुइना उहाँ बटैलै । यी प्राइभेट कम्पनी रहल ओरसे पहिले यी मिलके मालिकसंग बाट हुइना बटैलै ।
मिलके मालिकहे उपसमितिमे बोलाके उहाँके बाट बुझ्न संयोजक कृष्णकुमार श्रेष्ठ (किसान) बटैलै । बासुलिङ सुगर मिल सञ्चालनमे नन्ना का कैसिन अवरोध बटै उ अवरोध फुकैना सरकारहे दबाब ओ सुझाव समेत डेना उहाँ प्रतिवद्धता करले बटै । अनुगमनपाछे कुछ न कुछ रिजल्ट निकरना करके अपने काम कैना उहाँ आश्वासन डेले बटै ।
ओस्टेक करके अनुगमनके क्रममे कैलाली क्षेत्र नम्बर ३ के प्रतिनिधिसभा सदस्य अरुण कुमार चौधरी बासुलिङ सुगर मिल सञ्चालनके लाग अपने लागी परल बटैलै । टमान चो प्रतिनिधिसभामे मिल सञ्चालनके विषयमे अपने बोललफे बटैलै । बासुलिङ सुगर मिल सञ्चालनके विषयमे सुगर मिलके सञ्चालक अरुण चन्द भेटघाट समेत हुइल उहाँ बटैलै । यिहे मिल सञ्चालन हुइल खण्डमे यी क्षेत्रमे रोजगारीके ढोका खुल्ना उहाँक कहाई बा ।
सरकार पक्षसे कुछ बाट खुकुलो पारे सेक्लेसे मिल सञ्चालनमे ओसिन अप्ठ्यारो नइहुइना अरुण कुमार चौधरी बटैलै । अनुगमनके क्रममे उपसमिति सदस्य कान्तिका सेजुवाल, गणेश पराजुली, रामशंकर यादव ओ सूर्यमान दोङ तामाङ रहल रहिट । ओस्टेक कैलाली क्षेत्र नम्बर ३ के प्रतिनिधिसभा सदस्य अरुण कुमार चौधरी, लम्किचुहा नगरपालिका नगर प्रमुख सुशीला शाही, वडाके जनप्रतिनिधि ओ स्थानीयहु्कनके सहभागिता रहल रहे ।
