डा. केसीसे अनसन अन्त्य
पहुरा समाचारदाता
धनगढी, २ पुस । स्वास्थ्य, शिक्षा क्षेत्रके समग्र सुधार ओ सक्कु जनहनके समान पहुँचके मागसहित धनगढीमे सत्याग्रह सुरु करल डा. गोविन्द केसी सोम्मारके अनसन अन्त्य कैले बाटै ।
धनगढी उपमहानगरपालिका–७, देवहरियाके रेनुका चौधरी ओ धनगढी उपमहानगरपालिका–१ के अञ्जली नेपालीके हाठसे जुस पिके उहाँ अनसन टुरल हुइट । डा. केसी गैल शुकसे तीन दिनके लाग अनसन सुरु करल रहिट ।
अनसन टुर्टी उहाँ सुदूरपश्चिमके जनताके सहज स्वास्थ्योपचारके लाग अपने अनसन बैठल बटाइल रहिट । सुदूरपश्चिम प्रदेशमे मेडिकल शिक्षाके पह्राइ ओ दक्षजन शक्ति उत्पादनके लाग अपने इ लडाइ लरटी रहल स्पष्ट पर्टी उहाँ गेटामे सहिद दशरथ चन्द राष्ट्रिय स्वास्थ्य विज्ञान विश्वविद्यालय स्थापना हुइनामे अपन कौनो आपत्ति नैरहल स्पष्ट पारल रहिट ।
“मै यहाँके जनताके सुलभ रूपमे स्वास्थ्योपचारके लाग अनसन बैठल हो । यम्ने मोर कौनो स्वार्थ नैहो” केसी कहलै, “यकर लाग मै लरटी रहम । कुहीसे डराइवाला नैहुइटु ।”
अनसन टुरल डा. केसीहे उपचारके लाग सेती प्रादेशिक अस्पतालमे भर्ना करजैना ओहकान सहयोगी डा. अमृत जैशी जानकारी डेलै ।
