जमुनी महिला सावउसके १५ औं वार्षिक साधारणसभा
पहुरा समाचारदाता
भजनी, ६ पुस । कैलालीके भजनी नगरपालिका नगरपालिका वडा नम्बर ५, कुँडीस्थित जमुनी महिला समुदायिक वन उपभोला समूहके १५ औैं वार्षिक साधारणसभा ओ सर्वजानिक कार्यक्रम हुइल बा ।
पुरान भूमि व्यवस्था कृषि तथा सहकारीमन्त्री विनिता चौधरी उद्घाटन करल कार्यक्रम सावउसके अध्यक्ष बुधराम चौधरीके अध्यक्षतामे हुइल रहे । कार्यक्रम उद्घाटन करटि कृषिमन्त्री चौधरी सामुदायिक वन ओ स्थानीय तहबीच के कानूनके समस्याहे समाधान कैके आघे बह्रेपरना बटैलैं । उहाँ सामुदायिक वनसे डुनाटपरी उद्योग सञ्चालन कैके आर्थिक समृद्धि करे सेक्ना बटैलैं । उहाँ सामुदायिक वनसे लाभ लेहेक लाग संघ, प्रदेश ओ स्थानीय सरकारसे समन्वय करे परना कहलैं ।
कार्यक्रममे भजनी ननगरपालिका वडा नम्बर ४ के वडाध्यक्ष जन्ताराम चौधरी सामुदायिक सुधारके लाग वन समिति अपन जिम्मेवारी प्रभावकारी रुपमे वहन करे परना बटैलैं । अस्टेक उहाँ स्थानीय सरकारसे सामुदायिक वनहे सहयोगके आवश्यकता परलबेला सहयोग करना फेन प्रतिवद्धता व्यक्त करले रहैं ।
एफसीसीके अध्यक्ष खोजराम चौधरी स्थानीय उपभोक्ता काठ उपभोगमे समस्या रहल ओरसे स्थानीय सरकारसँग समन्वय कैके सहजरुपमे काठ उपलब्ध कराइ सेक्ना बटैलैं । बनुवाके अवस्था नाजुक रहल ओरसे वनके संरक्षण करेपरनामे फेन उहाँ जोड डेले रहैं । अस्टेक, सवडिभिजन वन कार्यालय भजनीके वनरक्षक प्रकाश विक वनुवाके लगैना टाँचा लगैना कामके वन समूहसे नीतिनियम बनाके आघे बह्रेपरना सुझैलैं ।
उ अवसरमे सावउसके सचिव जयराम चौधरी आर्थिक वर्ष २०७९/०८० सालके एक लाख ९२ हजार सात सय २० रुपैयाँ बराबरके आयव्यय प्रस्तुत करले रहैं ।
सावउसके साँधराम चौधरी स्वागत करल कार्यक्रममे सीएफसीसीके सचिव ईन्द्र विक, प्रगतिशील सावउसके अध्यक्ष दीपक चौधरी, सेन देउवा, अतिराम दहित, पत्रकार जीवन चौधरी लगायत शुभकामना मन्तव्य व्यक्त करले रहैं ।
