सुरक्षित तरिकासे वैदेशिक रोजगारमे जैना जोड
पहुरा समाचारदाता
धनगढी, १० पुस । बैदेशिक रोजगारमे जउइया जोकोइ फेन सुरक्षित तरीकासे जाइ पर्ना एक कार्यक्रमके सहभागीहुक्रे जोड डेले बाटै ।
तरङ्गिनी फाउण्डेशनके आयोजनामे मंगरके रोज धनगढीमे हुइल बैदेशिक रोजगार सम्बन्धी महिलाहुक्रनके अवस्था विषयक अन्तरक्रिया कार्यक्रमके सहभागीहुक्रे ओइसीन बटाइल हुइट । कार्यक्रमके सहभागिहुक्रे बैदेशिक रोजगारमे जाइ चाहुइया महिलाहुक्रे खास कैके मेनपावर कम्पनी, काम लगायत अन्य चीजके जानकारी लेहे पर्नाके साथे बैधानिक रुपमे किल वैदेशिक रोजगारमे जाइ पर्ना औल्याइल रहिट ।
राष्ट्रिय मानव अधिकार आयोग सुदूरपश्चिमके प्रमुख हरि ज्ञवाली बैदेशिक रोजगारमे जाइबर बैधानिक तरीकासे किल जाइ पर्ना बटाइल रहिट । बैदेशिक रोजगारमे जउइया अधिकांस व्यक्ति मेनपावर लगायत जाइ चाहल देशके नियमकानून, भाषा नैजानके समस्या ओ दुःख भोगे परल बटैटी उहाँ जाइ चाहल देशके कानून, श्रम, ओ भाषाबारे विशेष ध्यान डेहे पर्ना बटाइल रहिट । साथे उहाँ बैदेशिक रोजगारसे लौटल महिलाहुक्रनहे आर्थिक सामाजिक रुपमे आघे बह्रैना जोड डेहल रहिट ।
कार्यक्रममे इन्सेकके मैनामोति चौधरी महिलाहुक्रनहे आर्थिक, समाजिक, राजनीतिक रुपमे आघे बह्रैना आवश्यक रहल बटाइल रही ।
कार्यक्रममे बैदेशिक रोजगारसे आइल महिलाहुक्रे बिदेशमे भोगल आपन दुःख कष्टबारे अनुभव सुनाइल रहिट । धनगढी उपमहानगरपालिका वडा नम्बर १४ के सञ्जिता बुढामगर अपने बैदेशिक रोजगारमे जाके श्रम ओ समयके महत्व बुझल बटाइल रही ।
कार्यक्रममे टमान संघसंस्थाके प्रतिनीधी, संचारकर्मीहुक्रनके सहभागिता रहल रहे । कार्यक्रमके सहजीकरण पत्रकार उन्नती चौधरी करले रही ।
