२ सय क्षमताके आसरा सुधार केन्द्रके उदघाटन

पहुरा समाचारदाता
धनगढी, ११ पुस । कैलाली जिल्लाके धनगढी उपमहानगरपालिका–१४ फुलवारीमे २ सय क्षमता रहल आसरा सुधार केन्द्रके उदघाटन कैगिल बा ।

लागु औषध दुव्र्यशनीमे फसलहुकनहे सुधारके लाग सुविधा सम्पन्न रहल उ सुधार केन्द्रके उदघाटन बुधके रोज प्रहरी महानिरिक्षक बसन्तबहादुर कुवँर करले बटै । कार्यक्रमहे सम्बोधन करटी प्रहरी महानिरीक्षक कुँवर नेपाल प्रहरीके अन्य सुधार केन्द्र जस्टे यी शाखासेफे अपन विशिष्ट ओ प्रभावकारी पहिचान बनैटी सामाजिक सेवा मार्फत नेपाल प्रहरीके पहिचानहे अभिन प्रगाढ बनैना ठप मद्दत पुगैना बटैलै । लागूऔषध दुव्र्यशनीसे व्यक्ति, परिवारसंगे समुदायहे असर कैना उल्लेख करटी लागू औषधके प्रयोगमे संलग्न व्यक्तिहे रचनात्मक डगरमे अग्रसर करैना समाजके सक्कु तहतप्का ओ वर्गके साथ ओ सहयोग आवश्यक रहल बटैलै ।

लागू पदार्थप्रति वितृष्णा उत्पन्न करैना लागू औषध प्रयोगकर्ताके मनोबल ओ आत्मबल अभिवृद्धि कैना जरूरी रहल चर्चा करटी लागू औषधके नकारात्मक असरबारे सचेतनामूलक कार्यक्रम सञ्चालन करके समाजहे दुव्र्यशनसे मुक्त करैना नेपाल प्रहरीके अभियानहे सफल बनैना आम नागरिकके निरन्तर सहयोग मिल्न अपेक्षा व्यक्त करलै । समसामयिक आवश्यकता, नया सोच ओ दृष्टिकोणसहित आउर परिस्कृत, कल्याणकारी सेवामार्फत सुरक्षित ओ शान्त समाज निर्माणमे नेपाल प्रहरी सदैव अग्रसर रहना उहाँ प्रतिबद्धता समेत व्यक्त करलै ।

उ सुधार केन्द्र स्थापना हुइलपाछे लागु औषध दुव्र्यसनीमे लागलहुँक्रनहे सुधर्ना मौका मिल्ना उहाँ बटैलै । लागु औषध दुव्र्यशनीके कुलतसे लर्कनहे बचाइक लाग अभिभावकसे सदा हेरचाह कैना आग्रह करलै । डगर विस्राके लागु औषध दुव्र्यशनीमे फसल यूवा जनशक्तिहे सुधारमे डगरमे ल्यन्ना सक्कु जानेक सामाजिक दायित्व हो,’ उहाँ कहलै, ‘लागु औषध सेवन तथा करोबार बह्रटी गैल बा । ओम्ने यूवा शक्ति फस्टी गैल बटै । यी आसरा सुधार केन्द्र यी क्षेत्र लगायत प्रदेशके अन्य क्षेत्रके समस्या सुधार करेसेकी ।’

धनगढी उपमहानरपालिकाके मेयर गोपाल हमाल लागु औषधमे लर्का फस्गैलपाछे परिवारहे केल नाही सामजहे हुइना करल बटैलै । उहाँ कहलै, ‘लागु औषधके लाग घेँचा कटना, भारी भारी चक्कु मारामार कैना घटना हुइल बा । यहाँ प्रहरी कडाई कलेसे कञ्चनपुर भागके जैना, कञ्चनपुरमे कडाई कलेसे टीकापुर लम्की भग्ना घटना घटैना करल बा ।’

यी सुधार केन्द्र २२ ठो नगरपालिका ओ गाउँपालिकाके बनाइल बटैटी प्रदेशके पहिल सुधार केन्द्र रहल उहाँ बटैलै । यहाँ टमान मेरिक तालिमफे संचालन कैना ओरसे यहाँ अइना यूवा मजा दक्ष जनशक्तिके निकरलेसे समाजसे अपहेलना नाही आवश्यकता महशुश कैना नगर प्रमुख हमाल बटैले ।

कार्यक्रममे कैलाली जिल्लाके प्रमुख जिल्ला अधिकारी धर्मेन्द्र विष्ट बालबालिका ढेर पैसा माँग्ना, बानी व्यहोरा परिवर्तन हुइटी गैलेसे अभिभावकसे लर्कनहे ढेर हेरचाह कैना आग्रह करलै । लागु औषध दुव्र्यशनी बह्रटी गैल ओरसे शुन्यमे झारे नइसेक्लेसेफे न्यूनिकरणमे झर्ना प्रतिबद्धता जनैलै ।

कञ्चनपुर जिल्लाके प्रमुख जिल्ला अधिकारी गोपाल अधिकारी अब्बे भारी चुनौती रहल बटैले बटै । उहाँ कहलै, ‘मजा यूवा युरोप वा अमेरिका बटै । जे यहाँ बा ओइने कहु ना कहु लागु औषध दुव्र्यशनीमे फसल अवस्था बा ।’ कैलाली कञ्चनपुरसे लेके पहाडी जिल्लामे लागु औषध दुव्र्यशनीके समस्या बह्रल उहाँ बटैलै ।

नास्त कलेजके एमडि शिक्षाविद शिवहरी मुडभरी लागु औषध एक खाले विष रहल ओरसे यकर कुलटमे कबु नइफस्ना आग्रह करलै । उहाँ कहलै, ‘लागु औषधमे फसल यूवा अपन डाई बाबक लगाइल सोन चाँदीफे अछिनके चोरी कैके लगैठै । परल बेला डाई बाबाक ज्यानफेृ लेहे सेक्ना बटैलै ।

आसरा सुधार केन्द्र निर्माणके लाग धनगढी उपमहानगरपालिका, बेलौरी नगरपालिका, कैलारी गाउँपालिका, नवजीवन सेवा संघ, कैलाली उद्योग बाणिज्य संघलगायतसे सहयोग करले बा । उहे अवसरमे धनगढी उपमहानगरपालिकाके नगर प्रमुख गोपाल हमाल, बेलौरी नगरपालिकाके नगर प्रमुख पोतीलाल चौधरी, कैलारी गाउँपालिकाके अध्यक्ष राजसमझ चौधरीलगायतहे प्रशंसापत्र डेगिल रहे ।

आसरा सुधार केन्द्र फुलवारीके नवनिर्मित भवन सुदूरपश्चिम प्रदेश प्रहरी भरतबहादुर बोहराके घरगोस्यामे हुइल रहे । यकर संगे स्कूलके विद्यार्थीनसे ¥याली ओ केन्द्रके अँगनामे बृक्षरोपण कार्यक्रमफे हुइल रहे ।

कार्यक्रममे नेपाल प्रहरी श्रीमती संघके अध्यक्ष लक्ष्मी कुँवर, नेपाल प्रहरी श्रीमती संघ सुदूरपश्चिम प्रदेशके पदाधिकारी, टमान राजनैतिक दलके प्रमुख तथा प्रतिनिधि, सरकारी कार्यालयके प्रमुख तथा प्रतिनिधि, सुरक्षा निकायके प्रमुख, टमान संघसंस्थाके प्रमुख तथा प्रतिनिधि, टमान विद्यालयके शिक्षक तथा विद्यार्थी, संचारकर्मी लगायत प्रहरी कर्मचारीहुकनके उपस्थिति रहल रहे ।