नाउपाके पहिल महाधिवेशन पुस २६ से टीकापुरमे
पहुरा समाचारदाता
धनगढी, १८ पुस । नागरिक उन्मुक्ती पार्टीके पहिल महाधिवेशन यिहे यही पुस २६, २७ ओ २८ गते टीकापुरमे हुइना बा ।
बुधके रोज धनगढीमे पत्रकार सम्मेलनके आयोजना करके महाधिवेशन हुइनाबारे जानकारी डेहल हो । पहिल महाधिवेशनबारे जानकारी डेटी पार्टीके संरक्षक रेशम चौधरी तयारी करिब पुरा हुइल जनैले बटै । उहाँसे डेहल जानकारी अनुसार नाउपाके महाधिवेशनके उदघाटन प्रधानमन्त्री पुष्पकमल दाहाल प्रचण्डसे करैना तयारी हुइल जनैलै ।
महाधिवेशनमे प्रधानमन्त्री प्रचण्डसहित सक्कु पार्टीके शीर्ष नेताहुकनहे निमन्त्रणा करल संरक्षक चौधरी बटैलै । उहाँक अनुसार महाधिवेशनके उदघाटन सत्रमे भारतीय जनता पार्टी (भाजपा) के प्रतिनिधिके समेत सहभागिता रहना बा ।
महाधिवेशनमे देशके ५२ जिल्लासे ८ हजार प्रतिनिधि सहभागी हुइना उहाँ जानकारी डेलै । ३९ जाने पदाधिकारी ओ २४१ जाने केन्द्रीय सदस्य महाधिवेनसे चयन हुइना उहाँ बटैलै ।
यिहे विच उहाँ नागरिक उन्मुक्ति पार्टी (नाउपा)के संरक्षक रेशमलाल चौधरी राष्ट्रियसभा निर्वाचनमे सुदूरपश्चिम प्रदेशसे अपन पार्टीहे एक ठो सिट डेना समझदारी सत्तारुढ गठबन्धनभिटर हुइटी रहल बटैलै ।
