उपन्यासकार सर्वहारीहे धुस्वां पुरस्कार
पहुरा समाचारदाता
काठमाडौँ, २१ पुस । प्रशिद्ध उपन्यासकार धुस्वां साय्मिके नाउँमे स्थापित दुई पुरस्कार इ बरस थारू भाषाके उपन्यासकार कृष्णराज सर्वहारी ओ वरिष्ठ गायक एवं संगीतकार योगेश वैद्यहे प्रदान कैना हुइल बा ।
उपन्यास विधामे प्रदान करजैना ‘गंकी धुस्वां बसुन्धरा पुरस्कार’ सर्वहारीहे ओ ‘धुस्वां साय्मि सिर्जना पुरस्कार’ वैद्यहे डेना निर्णय करल हो । गंकी धुस्वां–बसुन्धरा प्रतिष्ठानके अध्यक्ष अरुण साय्मिके अध्यक्षतामे शुकके बैठल बैठकसे उक्त निर्णय करल हो ।
गंकी धुस्वां बसुन्धरा पुरस्कार नेपाली, नेपालीभाषालगायत नेपालके टमान मातृभाषामे लिखल उपन्यास विधाके लाग हरेक दुई बरसमे प्रदान करजाइठ् । इ बरस थारू भाषामे दुई उपन्यास लिखसेकल उपन्यासकार सर्वहारीहे इ पुरस्कार प्रदान कैना निर्णय हुइल हो । ओस्टके धुस्वां साय्मि सिर्जना पुरस्कारसे पुरस्कृत वरिष्ठ गायक यागेश वैद्यके नेपाली ओ नेपालभाषामे सयौं गीत रहल बावै ।
उपन्यास विधाके लाग प्रतिष्ठानसे विमल भौकाजीके संयोजकत्वमे नविन चित्रकार ओ सुरेश किरणसहित गठन करल उपसमितिसे सर्वहारीके नाउँ सिफारिस करल हो कलेसे संगीत विधाके लाग हरिहर शर्माके संयोजकत्वमे प्रतिसरा साय्मि ओ प्रकाश जिसी सहित गठन करल औरे उपसमितिसे वैद्यके नाउँ सिफारिस करल हो ।
पुरस्कार अइना माघ १ गते नेपाल प्रज्ञा प्रतिष्ठानमे एक कार्यक्रमबीच प्रदान कजैना बा । डुनु पुरस्कार ५० हजार रुपैयाँ राशिके रहल बा ।
