कनरीमे माघ मिलन कार्यक्रम
थारु संस्कृति सम्वद्र्धनमे सदैव सहयोग कैना मन्त्री देउवासे प्रतिवद्धता
पहुरा समाचारदाता
धनगढी, २१ पुस । कैलालीके धनगढी उपमहानगरपालिका वडा नम्बर १५ कनरीमे माघ मिलन कार्यक्रम हुइल बा ।
कोशिस कैलाली ओ मुल आयोजक समिति वडा नम्बर १५ के आयोजनामे तथा वडा नम्बर १५ के कार्यालयके आर्थिक सहयोगमे हमार कला, हमार पहिचान, धर्म संस्कृति सभ्यता बचैना हमार अभियान मुल नाराके साथ माघ मिलन कार्यक्रम हुइल हो । कार्यक्रमके खास प्रयोजक प्रेमाएग्रो इण्डिष्ट्रिज एण्ड ओ ज्योति आर्यल धनगढी–१५, सह प्रयोजक आशिष सपिङ सेन्टर धनगढी–७ मोतिचोक रहल रहे कलेसे कार्यक्रम सफल बनाइक लाग वडा नम्बर १५ के सक्कु गाउँसे टमान मेरके सहयोगफे कैगिल रहे ।
उदघाटन कार्यक्रममे सुदूरपश्चिम प्रदेश भौतिक पूर्वाधार विकास मन्त्रालयके माननीय मन्त्री प्रकाश बहादुर देउवाके वडका पहुनामे हुइल रहे । कार्यक्रममे उहाँ थारु समुदायके कला, संस्कृति सरक्षण, सम्वद्र्धन कैनामे अपन सदैव सहयोग रहना बटैलै । मन्त्री देउवा संस्कृति सरक्षणसंगे वडा नम्बर १५ रहल टमान मेरिक समस्या समाधानके लाग मन्त्रालयके ध्यान देनाफे बटैलै । ओस्टेक यी वडाहे कला, संस्कृतिके धनी वडाके रुपमे आघे बह्रैनाफे बटैले रहिट ।
कोशिस कैलालीके अध्यक्ष मनोज चौधरीके घरगोस्यामे हुइल कार्यक्रममे विशिष्ट पहुनामे धनगढी उपमहानगरपालिका वडा नम्बर १५ के वडा अध्यक्ष सुखदेव राना, वडा नम्बर ४ वडा अध्यक्ष बुद्धिबहादुर खडका, वडा नम्बर ८ के वडा अध्यक्ष जुगराम चौधरी, वडा नम्बर १९ के वडा अध्यक्ष बाँधुराम चौधरी, थारु कल्याणकरिणीसभाके केन्द्रीय सदस्य प्रभातकुमार चौधरी, कार्यपालिका सदस्य सुष्मा चौधरी, नेपाली काँग्रेस क्षेत्र नम्बर ५ के क्षेत्रीय सभापति भीम पडाल, कनरी समुदायिक वनके अध्यक्ष हरिनारायण चौधरी मन्तव्य व्यक्त करल रहिट । ओस्टेक कनरी गाउँक भल्मन्सा तथा मुल आयोजक समितिके संयोजक कालुराम चौधरी स्वागत मन्तव्य व्यक्त करल रहिट ।
कार्यक्रममे भूमि आयोगके विज्ञ सदस्य केशवराज जोशी, थाकसके नगर सभापति सूर्य प्रसाद चौधरी, वडास्तरके राजनीतिक दलके प्रमुख तथा प्रतिनिधि, कनरी प्रहरी चौकी इन्चार्ज टेकेन्द्र जोशी, सिद्धबाबा सामुदायिक वनलगागत वडा भिटर रहल सक्कु सामुदायिक वनके प्रदाधिकारी, वडा नम्बर १५ भिटर रहल सक्कु विद्यालयके विद्यालय व्यवस्थापन समिति अध्यक्ष, महिला स्वास्थ्य स्वय सेविका, वडा भिटर रहल सक्कु तोलके भल्मन्साहुकनके सहभागिता रहे ।
सखिया, झुमरा, दिन नँचुवा नाँच, मघौटा नाँच, वडा नम्बर १५ के प्रत्येक तोलके नाँचके प्रस्तुत हुइल रहे । चार ठो राष्ट्रिय कलाकारके प्रस्तुतीफे रहे । जेम्ने थारु महालोक गायक मनिराम करिया मघरिया, रामकुमार कठरिया, आरजु चौधरी, विक्रम चौधरी, राजिप सुनारके वेजोड प्रस्तुती रहे । कार्यक्रममे सहभागी पहुनाहुकनहे थारु परिकार ढिकरी, मच्छी, सिधरा, मुसक चटनी, गेंगटा, घोंघी, सुरिक सिकार पटोस्नी, खरियालगायतके खानाके व्यवस्था कैगिल रहे ।
उदघाटन कार्यक्रममे संचालन सीताराम चौधरी, करिष्मा चौधरी ओ सांस्कृतिक कार्यक्रममे संचालन वृजनारायण चौधरी ओ करिष्मा चौधरी करल रहिट । ओस्टेक करके वडा नम्बर १५ मे शिक्षा, स्वास्थ्य, खेलकुद, समाजसेवा लगायत क्षेत्रमे योगदान पुगाइल ३० जाने व्यक्तित्वहुकनहे कदरपत्रसहिट सम्मान कैगिल बा ।
