अपाङता रहल व्यक्तिके सवालमे सकारात्मक बटीः गाउँपालिका उपाध्यक्ष
पहुरा समाचरदाता
हसुलिया, २६ पुस । कैलारी गाउँपालिकाके उपाध्यक्ष भगवतीकुमारी चौधरी अपाङता रहल व्यक्तिहुकनके सवालमे सदैव सकारात्मक रहल बटैले बटी ।
राष्ट्रिय अपाङ महासंघ नेपाल सुदूरपश्चिम प्रदेशके आयोजनामे कैलारी गाउँपालिकाके समन्वय, राष्ट्रिय आदिवासी जनजाती अपाङ महिला संघ नेपालके साझेदारी ओ यूएनपीआरपीडी÷ यूएन वुमनके आर्थिक सहयोगमे अपाङगता ओ लैगिक उत्तरदायी बजेट तथा कार्यक्रम तर्जुमाके लाग अपांगता रहल व्यक्तिहुकनके लाग हुइल एक दिने पुर्नताजकी तालिमके वडका पहुना रहल गाउँपालिका उपाध्यक्ष उ बाट बत्वाइल रहिट ।
उहाँ कहली, ‘हम्रे जनप्रतिनिधि सदैव अपनेनके साथमे बटी । हम्रे हमार गाउँपालिकाहे अपाङमैत्री बनैना कामके सुरुवाट करले बटी । अपनेन लाग काम कैसिन योजना नाने परल अपनेनके सल्लाह सुझाव दि, छलफल करटी आत्मसात कैके हम्रे बह्रना तयार बटी ।’
राष्ट्रिय अपाङ महासंघ नेपाल सुदूरपश्चिम प्रदेशके अध्यक्ष मानबहदुर साउदके सभाध्यक्षमे हुइल कार्यक्रममे विशिष्ट पहुना कैलारी गाउँपालिका–१ के दलित महिला वडा सदस्य पुष्पा भुल, राष्ट्रिय अपाङ महासंघ नेपाल सुदूरपश्चिम प्रदेशके सदस्य दिलिप चौधरी रहल रहिट । कैलारी गाउँपलिकामे (समावेसी विकासप्रति स्थानीय सरकारके जवाफदेहिता स्थानीय नीति बजेट तथा कार्यक्रममे हमार अनिवार्य अर्थपुर्ण सहभागिता) अपाङता ओ लैङिगक उतरदायी बजेट तथा कार्यक्रम तर्जुमाके लाग अपांगता रहल व्यक्तीहुकनके लाग हुइल तालिममे कैलारी गाउपालिकाके जनप्रतिनिधित्व कैना करके हरेक वडाके ३ से ४ जाने अपाङता रहल व्यक्तिहुकनहे पुर्नताजकी तालिम डेहल बा ।
कार्यक्रममे अपाङता रहल व्यक्तीहुकनहे लैङिक समानता, अपांगता अधिकार, लैङिगक उत्तरदायी बजेट, अपाङता उत्तरदायी बजेट, स्थानीय बजेट तथा कार्यक्रम तर्जुमाके चरण ओ ओकर नीति नियमबारे खुल्ला छलफल तथा प्रश्नउत्तर सम्बन्धी पुर्नताजकी तालिम डेहल रहे ।
पुर्नताजकी तालिममे राष्ट्रिय अपाङ महासंघ नेपाल सुदूरपश्चिम प्रदेशके अध्यक्ष मा बहादुर साउद ओ यी परियोजनाके जिल्ला संयोजक चन्द्रकान्त पनेरु प्रशिक्षण डेहल रहिट ।
