सुदूरपश्चिम प्रादेशिक महोत्सव सुरु
सांसद वीरबहादुर बलायरहे ६ माग रख्टी नौ किलोके माला
पहुरा समाचारदाता
धनगढी, २६ पुुस । कैलाली क्षेत्र नम्बर ४ के संघीय सांसद वीरबहादुर बलायरहे ६ माग रख्टी नौ किलोके माला घलाइल बा ।
कैलालीके अत्तरियामे बिफेक रोजसे आयोजित सुदूरपश्चिम प्रादेशिक महोत्सवमे वडका पहुना रहल बलायरहे नौ किलोके माला लगैटी संघसे मागपत्रफे बुझाइल हो ।
मागपत्रमे गोदावरी नगरपालिका क्षेत्रभिटर खुल्ला मञ्चके व्यवस्थापन करके विकास कैना, गोदावरी धाम तथा हाटखोली क्षेत्रहे धार्मिक पर्यटकीय क्षेत्रके रुपमे घोषणा करके कार्य सञ्चालन कैना, सुदूरपश्चिम प्रादेशिक राजधानी यथाशीघ्र कार्यान्वयनमे नन्ना ओ गेटा विमानस्थलके स्तरोन्नतीके लाग आवश्यक पहल करे कहल बा ।
ओस्टेक करके, अत्तरिया बजार क्षेत्रके भीमदत्त राजमार्ग पूर्वपट्टिके नेपाली सेनाके भोगाधिकार रहल जग्गामे वर्षौसे घर टहरा बनाके व्यापार व्यवसाय करटी आइलहुकनके हकहितमे हुइना करके कार्यान्वयन कराके आवश्यक पहल करेपर्ना, गेटा मेडिकल कलेजहे विश्वविद्यालयके रुपमे सञ्चालन कैना आवश्यक पहल करडेना कहल बा ।
अत्तरिया प्रदेशके राजधानी ओ यी प्रादेशिक महोत्सवफे रहल ओरसे सुदूरपश्चिमके नौ जिल्ला समेट्न करके नौ कलोके माला लगाइल बटाइल बा ।
