अलग–अलग दुर्घटनामे चार जानेक मृत्यु
पहुरा समाचारदाता
धनगढी, २६ पुस । अलग अलग दुर्घटनामे चार जानेक मृत्यु हुइल प्रहरी जनैले बा ।
कैलालीमे मोटरसाइकल दुर्घटना हुके अछामके पञ्चदेवल विनायक नगरपालिका वडा नम्बर १ कुइकाके खकेन्द्र ढकाल ओ उहाँक गोसिनीय मैसरा ढकालके ज्यान गैल बा । बुधके साँझ कैलालीके मोहन्याल गाउँपालिका वडा नम्बर ७ मे पर्ना कुइने चिसापानी सडक खण्डके पितमारीमे दुर्घटना हुइल हो ।
ढकाल दम्पती सवार भे १३ प १०७४ नम्बरके मोटरसाइकल सडकसे दुई सय मिटर तरे कर्णाली लडियामे गिरल रहे । ओइने अछामसे बर्दियाके भुरीगाउँओर जैटी रहल रहिट । बुधके साँझ करिब सात बजेओर लडियामे गिर दुनु जानेक मोटर बोट ओ ¥र्याफिटङके सहायतासे उद्धार करल रहे । मृतकके शव टीकापुर अस्पतालमे धारल इलाका प्रहरी कार्यालय चिसापानी जनैले बा । मृतक ढकालके दुई छावा एक छाई बर्दियाके भुरीगाऊँमे बैठल बटै । ढकाल अछामके विनायक बजारमे बिजुली पसल धारके विद्युतके काम करिट ।
ओस्टेक करके कञ्चनपुरके भीमदत्त नगरपालिका–६ के वडाध्यक्ष महेन्द्र खड्काके निधन हुइल बा । बुधके रात मोटरसाइकल दुर्घटनामे परके उहाँक निधन हुइल जिल्ला प्रहरी कार्यालय कञ्चनपुर जनैले बा । भीमदत्त नगरपालिकाके प्रवक्ता समेत रहल उहाँ वडाके ऐठपुर क्षेत्र नहर किनारमे बिफेक सकारे मृत अवस्थामे फेला परल प्रहरी जनैले बा । उहाँ नेपाली कांग्रेससे वडाध्यक्ष निर्वाचित हुइल रहिट ।
ओस्टेक करके कञ्चनपुर जिल्लाके भीमदत्त न.पा. १४ पलिया स्थित पुर्वसे पश्चिमओर जैटी रहल बसके ठक्करके एक बालकके मृत्यु हुइल बा ।
से १ क ९९९ नम्बरके बसके ठक्करसे उहे ठाउँ बैठना गजेन्द्र कुँवरके छावाके वर्ष ३ के कार्तिक कुँवरके बुधके साँझ मृत्यु हुइल हो । बसके ठक्करसे गम्भीर घाहिल हुइल उहाँक महाकाली प्रादेशिक अस्पताल कञ्चनपुरमे उपचारके लाग लैगिलमे डाक्टरसे चेकजाँच करेबेर मृत घोषणा करल हो । उ बस ओ बस चालक वडा–१८ भाँसी बैठना बर्ष ६१ के रामबहादुर थापाहे प्रहरी नियन्त्रणमे लेनाके साथे उ घटना सम्बन्धमे आवश्यक अनुसन्धान करटी रहल बा ।
