जाइकाके सहयोगमे युवाहुकनहे जापान पठैटी धनगढी उपमहानगर
पहुरा समाचारदाता
धनगढी, २७ पुस । कैलालीके धनगढी उपमहानगरपालिकासे युवाहुकनहे सीप विकासके लाग जापान पठैना हुइल बा । जापान अन्तर्राष्ट्रिय सहयोग एजेन्सी (जाइका) सँगके सहकार्यमे उपमहानगरसे युवाहुकनहे जापान पठैना हुइल हो ।
बिफेक रोज उ सम्झौतामे जाइकाके प्रोजेक्ट म्यानेजर राजनकुमार पौडेल ओ धनगढीके मेयर गोपाल हमाल हस्ताक्षर करलै । जाइकासे मुख्य करके धनगढीके युवाहुकनमे उद्यमशीलता ओ करिअर विकासके काम कैना ओ जापानके कम्पनीमे यहाँके युवाहे जोरना काम कैना पौडेल जानकारी डेलै ।
उहाँ सम्झौता अनुसार युवाहुकनहे जापानमे सीपफे सिखे पठैना बटैलै । सम्झौतामे हस्ताक्षर करलपाछे मेयर हमाल जाइकाप्रति आभार व्यक्त करलै । उहाँ अब्बे जापान जैना युवापाछे नेपाल लौटके आईबेर रोजगारदाताके रूपमे आई पर्ना बटैलै ।
‘एकजाने जापान जैठै कलेसे पाछे यहाँ आईबेर उ पाँचजनहनहे रोजगार देहे । हम्रे धनगढीसे एक हजार जाने पठैली कलेसे उहोरसे लौटेबेर यहाँके पाँच हजारके लाग रोजगारी सिर्जना हुई,’ मेयर हमाल कहलै ‘हम्रे जापनिज बनैना पठैना नइकी । जापनिजहुकनके जैसिन काम कैना क्षमता विकास कैना पठैटी बटी ।’
