दुवईमे माघ मिलन तथा थारु सास्कृतिक कार्यक्रमके आयोजना
पहुरा समाचारदाता
धनगढी, २७ पुस । बैदेशिक रोजगारीके शिलशिलामे दुवईमे बसोबास करुइया थारुहुक्रे दुवईमे माघ टिहुवार तथा थारु समुदायके लौव बरस २६४७ के अवसरमे माघ मिलन तथा सांस्कृतिक कार्यक्रम कैना जनैले बटै ।
थारु कल्याणकारिणी सभा यू.ए.ईके आयोजनामे यिहे अइना माघ ७ गते अँटवारके रोज सभाके १०औं वार्षिक भेला तथा तिला सकरा, खिचरा, खिचरी, माघ, माघ मिलन कार्यक्रम करे लागल थारु कल्याणकारिणी सभा यू.ए.ईके केन्द्रीय सदस्य शिवचरण चौधरी जनैलै ।
थारु कला ओ संस्कृति हमार पहिचान, यिहीहे संरक्षण सम्बद्र्धन कैना हमार अभियान कना मुल नाराके साथ माघ मिलन तथा सांंस्कृतिक कार्यक्रम हुई लागल हो ।
क्लव एभरेष्ट अष्टोरिया होटल बर दुवईमे हुइना कार्यक्रममे उहे बैठना थारु कलाकारके बेजोड प्रस्तुती रना ओ नेपालसे गायिका सोनु कुश्मीथारु ओ गायक प्रकाश माझीथारुहे निमन्त्रण करल सभाके केन्द्रीय सदस्य शिवचरण बटैलै ।
दुवईमे नेपालके पुरुवसे पश्चिमसमके थारु समुदायके बसोबास रहल ओरसे सक्कु ओरके सांस्कृति झल्ना नाँच प्रस्तुत हुइना उहाँ जनैलै ।
