चैतन्य माघ मिलन कार्यक्रम

शिक्षासंगे कला सस्कृतिहे जर्गेना कैनामे जोड

पहुरा समाचारदाता
धनगढी, २७ पुस । कैलालीके धनगढी उपमहानगरपालिका–५ शिवनगरमे रहल चैतन्य पाठशाला स्कुलसे माघी मिलन २०८० एक कार्यक्रम मनैले बा ।

शिक्षासंगे संस्कारहे प्राथमिकता डेटी आइल चैतन्य पाठशालासे शुकके रोज माघी मिलनके अवसर पारके एक कार्यक्रम कैके मनाइल हो । कार्यक्रममे विद्यार्थीहुक्रे टमान मेरिक नाँचगान प्रस्तुत कैनाके थारु चौधरी जातीसे विशेष माघी मन्ना हुइल ओरसे यिहीहे जार्गेना कैना उद्देश्यसे यी माघी मिलन कार्यक्रम करल हो । सुदुरपश्चिमके मौलिक खानाके परिकार पाठशालासे प्रर्दशनी करले बा ।

कार्यक्रमके वडका पहुना रहल चैतन्य पाठशालाके प्रमुख सल्लाकार चैतन्य ईन्सिच्चुट रिसर्च एण्ड डेभलपमेन्ट अध्यक्ष डा. हेमराज पन्त रहल रहिट । कार्यक्रममे सम्बोधन करटी डा. पन्त शिक्षासंगे कला सस्कृतिहे हमे्र सक्कु मिल्के जर्गेना करेपर्ना आवश्यक रहल बटैले बटै । उहाँ सुदुरपश्चिमके पहिचान, कला सस्कृतिहे हम्रे कबु भुलाई नइहुइना कहटी काल्हके पुस्तासे संस्कृतीबारे पुस्तान्तरणके लाग आवश्यक रहल बटैलै ।

उहाँ कहलै, ‘परम्परागत संस्कृति हम्रे जर्गेना करे नइसेक्ली कलेसे काल्ह अइना पुस्ता कुछ पत्ता नइपैही । ओकर लाग संस्कृतिहे बचैना हम्रे आ अपन ओरसे लागे पर्ना जरुरी बा । यम्ने अपने हुइना कौनोफे सहयोगी हात सदैव आघे बह्रैटी रना जबफे हम्रे तयारी बटी ।

चैतन्य पाठशालाके सहायक प्रधानाध्यापक कटकबहादुर सिंह कला ओ सभ्यतासंगे संस्कृति जोगैना हमार पहिल उदेश्य रहल बटैलै । शिक्षासँगे कला ओ संस्कृतिके मुल्य मान्यता विद्यार्थीहुकनमे जागृत करैना, दक्ष, क्षमतावान, अब्बल विद्यार्थी उत्पादन कैना उद्देश्य चैतन्य पाठपाशालाके रहल बटैटी माघ पर्वके शुभकामना डेहल रहिट । उहाँ शिक्षा ओ संस्कारके कारण अब्बे संस्कृतिके विकास हुइटी रहल बटैटी शिक्षासे संस्कार ओ संस्कारसे शिक्षाहे जोरना पुलके काम करल बटैलै ।

कार्यक्रममे थारु समुदायके माघ टिहुवारके बारेमे ठाकुर प्रसाद करियाप्रधान जानकारी डेहल रहिट । उहाँ माघ थारु समुदायके लौवा बरसके रुपमे मनैटी आइल ओ यकर महत्वबारे जानकारी डेहल रहिट ।

चैतन्य पाठशालकाके अध्यक्ष गणेश प्रसाद जोशीके अध्यक्षतामे हुइल कार्यक्रममे विशिष्ट पहुना धनगढी उपमहानरपालिका वडा ५ के वडा अध्यक्ष गजेन्द्रबहादुर शाही, धनगढी उपमहानगरपालिका वडा न. ६ के वडा अध्यक्ष भागीराम चौधरी, वडा न.७ के वडा अध्यक्ष मोतीलाल राना, वडा न ८ के वडा अध्यक्ष जगुराम चौधरी, चैतन्य पाठशालाके पिटीए, अध्यक्ष ईश्वर गिरी, थारु कल्याणकारिणी सभाके केन्द्रीय सदस्य प्रभातकुमार चौधरीलगायत अभिभावक, चैतन्य पाठशालाके प्रिन्सिपल अशोकराज खाती, विद्यालयके शिक्षक तथा शिक्षिका, विद्यार्थीहुकनके सहभागीता रहल रहे ।

कार्यक्रमके सञ्चालन शिक्षिका हेमा जोशी करल रहिट । ओस्टेक करके टमान व्यक्तिहुनकहे सम्मान कैनाके साथे मायाके चिनो प्रदान कैगिल बा ।