थारुहुक्रे माघ सांस्कृतिक महोत्सव खुलामञ्चमे मनैलै
पहुरा समाचारदाता
सुर्खेत, २९ पुस । माघ पर्वके महान अवसरमे कर्णाली प्रदेशके राजधानी वीरेन्द्रनगरके घण्टाघरके खुला मञ्चमे लखागिन थारु उत्थान मञ्च, सुर्खेत, थारु कल्याणकारिणी सभा सुर्खेत ओ राष्ट्रिय थारु कलाकार मञ्च,संयुक्त आयोजनामे विविध सांस्कृतिक नाँचगान झाँकीसहित बजार परिक्रमा करके माघ सांस्कृतिक महोत्सव कार्यक्रम सम्पन्न करले बा ।
कार्यक्रममे माघ पर्वके महत्व एवम् मौलिकताके बारेमे नयाँ पुस्ताहे पत्ता नइहुके संस्कृतिप्रति सद्भाव हेरैटी गैल ओरसे यी बार कार्यक्रममे माघके सामाजिक, सांस्कृतिक एवम् धार्मिक महत्वबारे प्यानलिष्ट छलफल करल रहे । जेम्ने माघ सम्बन्धी जानकार पुर्खा जागुराम थारु, थारु कल्याणकारिणी सभाके केन्द्रीय सदस्य कृष्णबहादुर थारु ओ समाजसेवी लालबहादुर चौधरी रहिट । प्यानलिष्ट छलफलमे मोडरेटके भूमिकामे मानबहादुर चौधरी पन्ना रहिट ।
छलफलमे माघ पर्वहे औपचारिक रुपमे केल नइहुके यकर मूलभूत मूल्य मान्यताहे जोगैना आवश्यक रहल बटैलै । यकर लाग समयअनुसार रुपान्तरण हुइनाफे आवश्यक बा मने अपनपन भुले नइहुइना ओ युवा पुस्ता ओ पुरान पुस्ता दुनु जागरुक हुइना जरुरी रहल निष्कर्ष रहे ।
कार्यक्रमके प्रमुख अतिथि वीरेन्द्रनगर नगरपालिकाके नगर उपप्रमुख निलकण्ठ खनाल सदियौसे हेपल, चेपल थारु समुदाय देशमे लोकतान्त्रिक गणतन्त्र स्थापनापाछे राज्यसत्तामे पहुँच पुगल बा । स्थानीय तहमे थारु समुदायके प्रतिनिधिके उपस्थिति बा । नेपालमे पञ्चायत काल राजाके समयमे जमिनदारहुक्रे सोझा थारुह्कनहे यी गाउँसे उ गाउँ नजा, उ गाउँसे यी गाउँ आ कहलपाछे बोले नइसेक्ना थारु समुदाय आज बोले सेक्ना हुइल बा । अपन अधिकार स्थापित करे सेक्ना हुइल बा । यी सब लोकतन्त्रसे हु्इल उपलब्धी हो उहाँ कहलै । थारु कला संस्कृतिमे बहुट धनी रहल ओरसे सुर्खेतके थारु समुदायके लाग सदैव लग्टी रना ओ नगरपालिकासे करे सेक्ना सक्कु सहयोग हुइना बटैलै ।
लखागिन थारु उत्थान मञ्च, सुर्खेतके अध्यक्ष मानबहादुर चौधरी पन्ना – लुम्बिनी प्रदेशक थारु समुदायहे प्रदेश सरकार एवम् स्थानीय सरकारसे करिब ३ दिनसम थारुहे विदा डेना करल मने थारु समुदाय माघके महान पर्वमेफे र्णाली प्रदेशको वीरेन्द्रनगरमे केल बसोबास रहल थारुहुकनहे स्थानीय तहके सरकारसे थारु समुदायके कर्मचारी, शिक्षक, विद्यार्थीहुकनह दुई दिनसम बिदाके व्यवस्था नइहुइना दुखद हो कहलै । लुम्बिनी ओ सुदूरपश्चिम प्रदेशमे हरेक वर्ष थारुहुकनहे दुई दिनसम सार्वजनिक बिदा डेहेबेर सुर्खेती थारुहुक्रे अन्यायमे परल गुनासो करलै ।
कार्यक्रममे वीरेन्द्रनगर नगरपालिकाके कार्यपालिका सदस्य सरिता चौधरी– थारु समुदायके लाग अपने सदैव लागि पर्ना ओ समुदायसे धारल माग योजनाहे आघे बह्रैना प्रतिवद्धता व्यक्त करटी माघके शुभकामना डेलै ।
कार्यक्रममे थारु कल्याणकारिणी सभाके जिल्ला सभापति बेचुलाल चौधरी धन्यवाद ठेहल रहिट । कार्यक्रममे थारु समुदायके उत्थानके लाग निरन्तर भाषा, कला, संस्कृतिमे विशेष योगदान पुगुइया समाजसेवी तथा कलाकारहुकनहे सम्मान करल रहे । सम्मानित हुइनामे वीरेन्द्रनगर–२,के समाजसेवी कलाकार लालबहादुर चौधरी, मन्द¥या कलाकार कालुराम थारु, कलाकार कृष्णा चौधरी, वीरेन्द्रनगर–९ के मन्द¥या कलाकार शेरबहादुर थारु ओ वीनपा–१० के समाजसेवी तथा वुद्धिजीवि शनिश्ररा महतम रहल बटै ।
माघ सांस्कृतिक महोत्सवमे टमान गाउँसे आइल नाँचबिच प्रतिस्पर्धी हुइल रहे । छोक्रा मघौटा नाच प्रतियोगितामे वीनपा ९, तिलपुर गाउँ प्रथम, वीनपा–१० पदमपुरके द्धितीय, विनपा–२ कोलडाँडा नयावस्तीके तृतीय स्थान हुइल रहिट । कलेसे बाँकी सक्कु सहभागी नाँचहे प्रोत्साहन स्वरुप सान्त्वना पुरस्कार प्रदान करल रहे । प्रतियोगीहुकनहे पुरस्कार तथा प्रमाण पत्र कार्यक्रमके सभाध्यक्ष मानबहादुर चौधरी पन्ना करल रहिट ।
वीनपा २, कोलडाँडाके मानबिर थारु, ठौरीके टेकबहादुर चौधरी, फलाँटेके कालिका चौधरी ओ वीनपा १०, बुदबुदीके बिन्दु चौधरीहे सम्मान करल रहे । कार्यक्रममे टमान थारु कलाकारहुकनके थारु नृत्य तथा गीत समेत प्रस्तुत करल रहे । कार्यक्रमके सञ्चालन लखागिन थारु उत्थान मञ्च सुर्खेतके सचिव जितबहादुर चौधरी ओ राष्ट्रिय थारु कलाकार मञ्च, सुर्खेतके अध्यक्ष राजु चौधरी करल रहिट ।
