धनगढी उपमहानगरपालिकासे मालपोत कार्यालयमे सोलार पावर जडान
पहुरा समाचारदाता
धनगढी, ४ माघ । धनगढी उपमहानगरपालिकासे मालपोत कार्यालय धनगढीमे सोलार पावर जडान करले बा ।
विद्युत गैल समयमे मालपोतके सेवा अवरुद्ध हुइना ओरसे उपमहानगरपालिकासे सोलार पावर सहयोग करल हो । भूमि सुधार तथा मालपोत कार्यालय, धनगढी कैलालीमे धनगढी उपमहानगरपालिका, गौरीगंगा नगरपालिका, गोदावरी नगरपालिका , चुरे गाउँपालिका, कैलारी गाउँपालिका, घोडाघोडी नगरपालिका, बर्दागोरिया गाउँपालिका अे भजनी नगरपालिकाके जनता सेवा लेना करल बटै ।
विद्युत सेवा अवरुद्ध हुइल कलेसे मालपोत कार्यालयके सेवा ठप्प रहन अवस्थाके अन्त्य कैना उपमहानगरपालिकासे सोलार पावर जडान करल नगरप्रमुख गोपाल हमालके सचिवालय जनैले बा । धनगढी ओ अन्य स्थानीयतहसे आइल सेवाग्राहीसे एक्के कामके लाग ३÷४ दिनसम कुरे पर्ना अवस्थाके अन्त्य कैना सोलार पावर जडान करल हो । सोलार पावर जडान हुइलपाछे बत्ती नइरहल अवस्थामेफे सेवाग्राहीके काम सुचारु हुई ।
धनगढी उपमहानगरपालिकासे ९ लाख ९८ हजारके लागतमे सोलार पावर जडान करल जनैले बा । नेपाल उर्जा विकास कम्पनी प्रालि, काठमाडौंसे भूमिसुधार तथा मालपोत कार्यालयमे सोलार ईन्भटर पावर व्याकपके जडान कार्य करल हो ।
बिफेक रोज एक समारोह आयोजना करके प्राध्यापक डाक्टर हेमराज पन्त उ सोलार पावर उद्घाटन करल हुइट । उ अवसरमे नगर प्रमुख गोपाल हमाल, भूमीसुधार तथा मालपोत कार्यालय धनगढी, कैलालीके कार्यालय प्रमुख, नापी कार्यालयके. प्रमुख, धनगढी उपमहानगरपालिका डिभिजनल ईन्जिनियर लगायत मालपोतके कर्मचारी ओ सेवाग्राहीके उपस्थिति रहल रहे ।
धनगढी उपमहानगरपालिकाके नगर प्रमुख हमाल प्रायः मालपोत कार्यालयसे सेवाग्राहीके “काम नइहुइल बत्ती नइहो’ कना गुनासो अइटी रना ओरसे सोलार पावर सहयोग करल बटैलै । उहाँ उपमहानगरके पहिल प्राथमिकता नगरवासीके सेवा रहल ओरसे सोलार पावर जडान करके सेवा पैना सहजीकरण करल बटैलै ।
मालपोत जनताके प्रत्यक्ष सरोकारके विषय हुइल ओरसे जनताहे हाली सेवा डेले केल जनताके सरकारप्रतिके विश्वास बह्रटी जैना ओ निराशा बीच आशाके दीप बरटी जैना कार्यक्रमके प्रमुख अतिथि प्राध्यापक डाक्टर हेमराज पन्त बटैलै । मालपोत कार्यालयसे सोलार पावर जडान हुइल पश्चात् बत्ती गैल अवस्थामेफे सेवाग्राहीके काम कैना सहज हुइना जनागिल बा ।
