पवेराके भल्मन्सामे खुशीराम ओ बाँसखेराके भल्मन्सामे गीता चौधरी चयन

पहुरा समाचारदाता
धनगढी, ७ माघ । कैलाली जिल्ला कैलारी गाउँपालिका वडा नम्बर ५ स्थित पवेरा गाउँके भल्मन्सामे खुशीराम चौधरीहे फेरसे एक बरसके लाग जिम्मेवारी सौपगैल बा ।

अँटवारके रोज पवेरा गाउँ समाजके भुरा खेलसे भल्मन्सामे खुशीराम चौधरी, अघारीमे रामनाथ कठरिया ओ सचिवमे विपराम चौधरीहे एक बरसके लाग फेरसे जिम्मेवारी डेहल हो ।

ओस्टेक करके पवेरा गाउँ समाजके उपाध्यक्षमे प्रेमबहादुर चौधरी, सहसचिवमे परसराम चौधरी सर्व सहमतसे चयन हुुइल बटै ।
ओस्टे सदस्यमे शान्तिदेवी चौधरी, रामकृष्ण महतों, विष्णुबाबु कठरिया, नैना कठरिया, क्षेत्रपाल चौधरी, गुलावसिंह महतो, सुस्मिता कठरिया रहल बटै ।

ओस्टेक पवेरा गाउँ समाजके सल्लाहकारमे नेकीराम महतो, तेजराम चौधरी, रामकुमार महतो ओ प्रेम चौधरीडगौरा रहल बटै । भुरा खेलमे सचिव विपराम चौधरी बरसभर कैगिल गतिविधिबारे जानकारी डेटी पवेरा गाउँ समाजके खातामे ३ लाख ३४ हजार रुप्या बचत रहल जानकारी डेलै ।

कार्यक्रममे समाजके उपाध्यक्ष प्रेमबहादुर चौधरी गाउँ घरमे यूवा पिढी लागु औधषके दुव्र्यसनीमे फस्टी गैरसे यूवा नेतृत्वहे गाउँ समाज सुधार ओ मजा कामके लाग सक्रिया बनैना जरुरी रहल बटैलै । गाउँ समाजके सहसचिव तथा बुद्धिजिवि परसराम चौधरी गाउँमे रहल कोषहे बह्रैटी लौव काम करेबेर सक्कु जानेक सहमति अनिवार्य रहल बटैलै । उहाँ समाजके पैसा सामाजिक कार्यमे लगैना मजा रहल मने प्रतिफल मिल्ना काममे लगानी कैना सुझाव डेहल बटैलै । समाजके पैसा यूवा क्लवहे खेल सामाग्री खरिद ओ थारु सांस्कृतिक कार्यक्रमके लाग सहयोग कैगिल रहे ।

समाजके सल्लाहकार रामकुमार महतो गाउँ समाजहे सुधार करेक लाग सक्कु जाने रचनात्मक सुझाव जरुरी रहल बटैलै । यी बरसके लौवा योजना बनाइक लाग आ–अपन ओरसे सुझाव डेना जरुरी रहलफे बटैलै । भुरा खेल कार्यक्रममे समाजके सदस्य क्षेत्रपाल चौधरी, सल्लाहकार नेकीराम महतोफे सुझाव डेहल रहिट ।

अनुमोडित भल्मन्सा खुशीराम चौधरी अपने सेकटसम गाउँ समाजके लाग निश्वार्थ सेवा डेहल ओ गैल बरसमे हुइल कमीकम्जोरीमे गाउँ समाजके सुझाव अनुसार आघे बह्रना प्रतिवद्धता जनैलै । पवेरा गाउँमे २ सय १२ किसान रहल रहल बटै ।
ओस्टेक करके अगामी योजना निर्माणके लाग पवेरा गाउँ समाजके समितिहे जिम्मेवारी डेहल बा । कलेसे बनल नियम कानूनहे पास कैना की नइ कैना कहिके फेरसे समाजहे बोलैना कहल बा ।

ओस्टे करके कैलाली जिल्ला धनगढी उपहानगरपालिका वडा नम्बर ११ बाँसखेरामे गीता चौधरीहे फेरसे गाउँक नेतृत्व कैना जिम्मेवारी सौपाल बा । गाउँक बुद्धिजिवी तथा धनगढी उपमहानगरपालिका नगर भल्मन्सा समितिके अध्यक्ष रोहितकुमार चौधरी पुराने भल्मन्सा गिता चौधरीहे भुरा खेलसे तीन बरसके लाग भल्मन्सा बनैना कहिके गाउँ समाज सर्वसहमतसे निर्णय करल बटैलै । ओस्टेक करके भुखराम चौधरीहे चिराकी बनागिल बा ।